ನನ್ನ ಬ್ಲಾಗ್ ಪಟ್ಟಿ

ಮಂಗಳವಾರ, ಆಗಸ್ಟ್ 30, 2011

ರಾಜಕೀಯ ಬಗ್ಗಡವಾಗಿರುವಾಗ ಹೆಗಡೆ ನೆನಪಾದರು!

ಆ ಕುರುಚಲು ಗಡ್ಡ, ಹೆಗಲ ಮೇಲೊಂದು ಶಾಲು. ಅವರನ್ನು ನೋಡುವುದಕ್ಕೇ ಒಂಥರಾ ಖುಷಿ. ಮಾತು ನಿಧಾನ, ಆದರೆ ಬಲು ತೂಕ. ಕನ್ನಡವೂ ಸ್ಫುಟ, ಇಂಗ್ಲಿಷ್ ಮೇಲೂ ಪ್ರಭುತ್ವ. ಒಂದು ಸಣ್ಣ ಟೀಕೆಗೂ ಸ್ಪಂದಿಸುವ ಸಂವೇದನೆ. ಆರೋಪ ಎದುರಾದಾಗ ಎರಡು ಬಾರಿ ರಾಜೀನಾಮೆ ನೀಡಿದ ಅವರ ಸನ್ನಡತೆ. ಸಾಕಷ್ಟು ಗ್ಝ್ಛಜಡ ಇದ್ದರೂ ಗ್ಝ್ಠಡ್ಡಿಜಡ ಎದ್ದು ಕಾಣುವ ವ್ಯಕ್ತಿತ್ವ. ನಾವು ಶಾಲೆಗೆ ಹೋಗುವಾಗ ತೊಟ್ಟಿದ್ದು ಅವರು ಕೊಟ್ಟ ಉಚಿತ ಸಮವಸ್ತ್ರಗಳನ್ನೇ. ನಾವು ಓದಿದ್ದೂ ಅವರು ನೀಡಿದ ಪುಕ್ಕಟೆ ಪಠ್ಯಪುಸ್ತಕಗಳನ್ನೇ.

ಅವರ ಹೆಸರು ರಾಮಕೃಷ್ಣ ಹೆಗಡೆ!

ಅವರನ್ನು ಒಬ್ಬ ಮುಖ್ಯಮಂತ್ರಿ ಎನ್ನಬೇಕೋ, ಜನನಾಯಕ ಎನ್ನಬೇಕೋ ಎಂಬ ಗೊಂದಲವುಂಟಾಗುತ್ತದೆ. ಸಂಸದೀಯ ಪ್ರಜಾತಂತ್ರದಲ್ಲಿ ಯಾರು ಬೇಕಾದರೂ ಪ್ರಧಾನಿ, ಮುಖ್ಯಮಂತ್ರಿಯಾಗಬಹುದು, ಸಂಖ್ಯಾಬಲದ ಮೇಲೆ ನಡೆಯುವ, ನಿಂತಿರುವ ಈ ಪ್ರಕ್ರಿಯೆಯಲ್ಲಿ ಜಯಿಸಿ ಯಾರೂ ಅಧಿಕಾರ ಚಲಾಯಿಸಬಹುದು, ಎಂಥೆಂಥವರೂ ಗದ್ದುಗೆ ಏರಬಹುದು ಎಂಬುದನ್ನು ನಾವು ಕಾಣುತ್ತಿದ್ದೇವೆ. ಈ ರಾಜ್ಯ 20 ಮುಖ್ಯಮಂತ್ರಿಗಳನ್ನು ಕಂಡಿದ್ದರೂ ಗದ್ದುಗೆ ಏರಿದ ಮೇಲೂ ಜನನಾಯಕರೆಂಬಂತೆ ಕಂಡವರು, ಜನರ ಭಾವನೆಗಳಿಗೆ ಬಹುವಾಗಿ ಸ್ಪಂದಿಸಿದವರು, ಜನರ ಅಭ್ಯುದಯಕ್ಕೆ ಬಹುವಾದ ಆದ್ಯತೆ ಕೊಟ್ಟವರು ಇಬ್ಬರು ಮಾತ್ರ-ಡಿ. ದೇವರಾಜ್ ಅರಸು ಹಾಗೂ ರಾಮಕೃಷ್ಣ ಹೆಗಡೆ.

ನಿಮಗೆ ಬೆಂಡಿಗೆರಿ ಪ್ರಕರಣ ನೆನಪಿರಬಹುದು. ದಲಿತನೊಬ್ಬನಿಗೆ ಮಲ ತಿನ್ನಿಸಿದ ಘಟನೆ ನಡೆದಾಗ ಮುಖ್ಯಮಂತ್ರಿಗಾದಿಯಲ್ಲಿ ಕುಳಿತಿದ್ದ ಹೆಗಡೆಯವರು ಎಷ್ಟು ಕುಪಿತರಾದರೆಂದರೆ ಇನ್ನು ಮುಂದೆ ಇಂತಹ ಪ್ರಕರಣ ನಡೆದರೆ ತಪ್ಪಿತಸ್ಥನಿಗೆ ದೌರ್ಜನ್ಯಕ್ಕೊಳಗಾದ ದಲಿತನಿಂದಲೇ ಮಲ ತಿನ್ನಿಸುತ್ತೇನೆ ಎಂದು ಗುಡುಗಿದರು. ಆಯಾ ಜಿಲ್ಲೆಗಳ ಎಸ್ಪಿಗಳನ್ನೇ ಹೊಣೆಗಾರರನ್ನಾಗಿ ಮಾಡುತ್ತೇನೆ ಎಂದರು. ಅದರಿಂದ ದಲಿತರ ಆತ್ಮಸ್ಥೈರ್ಯ ಹೆಚ್ಚಾಯಿತು. ಅಷ್ಟೇ ಅಲ್ಲ, ದಲಿತರಲ್ಲಿನ ಪ್ರತಿಭೆಗೆ ಮಣೆಹಾಕಲು, ಅರ್ಹತೆಯನ್ನು ಗುರುತಿಸಲು ಹಿಂದೆಂದೂ ಕಂಡುಕೇಳರಿಯದ ಕ್ರಮವೊಂದನ್ನು ಕೈಗೊಂಡರು. ದಲಿತ ವಿದ್ಯಾರ್ಥಿಯೊಬ್ಬ ಪದವಿ ಅಥವಾ ಎಂಎ, ಎಂಎಸ್ಸಿ, ಎಂಕಾಂ ಮುಂತಾದ ಸ್ನಾತಕೋತ್ತರ ಪದವಿಗಳಲ್ಲಿ ರ್ಯಾಂಕ್ ಪಡೆದರೆ ಆತನನ್ನು ಪ್ರೊಬೇಷನರಿ ಅವಧಿಗೆ ವಿವಿಧ ಇಲಾಖೆಗಳಿಗೆ ನೇರವಾಗಿ ನೇಮಕ ಮಾಡಿಕೊಳ್ಳುವ ಪದ್ಧತಿ ಜಾರಿಗೆ ತಂದರು. ಮತ್ತೆ ಆತ ಸ್ಪರ್ಧಾತ್ಮಕ ಪರೀಕ್ಷೆ, ಸಂದರ್ಶನ ಎದುರಿಸುವ ಪ್ರಮೇಯವೇ ಇಲ್ಲದಂತೆ ಮಾಡಿದರು. ಇವು ದಲಿತರ ಮಾನಸಿಕ ಸ್ಥೈರ್ಯವನ್ನು ವೃದ್ಧಿಸುವ ತೀರ್ಮಾನಗಳಾಗಿದ್ದವು. ಅವರು ಪ್ರಾಥಮಿಕ ಶಾಲಾ ಮಕ್ಕಳಿಗೆ ಉಚಿತವಾಗಿ ಯೂನಿಫಾರ್ಮ್ ಕೊಡಮಾಡಿದ ಹಿಂದೆಯೂ ತಾರತಮ್ಯ ಭಾವನೆಯನ್ನು ತೊಡೆದುಹಾಕುವ, ಎಲ್ಲರೂ ಸಮಾನ ಎಂಬ ಭಾವನೆಯನ್ನು ಮೂಡಿಸುವ ಯೋಚನೆಯಿತ್ತು. ಈ ರೀತಿ ಸಮವಸ್ತ್ರ ಹಾಗೂ ಪಠ್ಯಪುಸ್ತಕಗಳೆರಡನ್ನೂ ಉಚಿತವಾಗಿ ನೀಡುವ ಯೋಜನೆ ದೇಶದಲ್ಲಿಯೇ ಮೊದಲ ಪ್ರಯೋಗವಾಗಿತ್ತು.

1983ರಲ್ಲಿ ಮೊದಲ ಬಾರಿಗೆ ಮುಖ್ಯಮಂತ್ರಿಯಾದ ರಾಮಕೃಷ್ಣ ಹೆಗಡೆಯವರು ತೆಗೆದುಕೊಂಡ ಕೆಲ ನಿರ್ಧಾರಗಳು ಹೇಗೆ ಮಾದರಿಯಾಗಿದ್ದವೆಂದರೆ ಪ್ರಧಾನಿಯಾಗಿದ್ದ ರಾಜೀವ್ ಗಾಂಧಿಯವರೇ ಅನುಕರಣೆಗೆ ಹೊರಟರು. ಪಂಚಾಯತ್ ರಾಜ್ ಕಾಯಿದೆಯನ್ನು ಜಾರಿಗೆ ತಂದ ಮೊದಲ ರಾಜ್ಯ ಕರ್ನಾಟಕ. ರಾಜೀವ್ ಗಾಂಧಿಯವರು ಸಂವಿಧಾನಕ್ಕೆ 73ನೇ ತಿದ್ದುಪಡಿ ತಂದು ಜಾರಿ ಮಾಡಲು ಹೊರಟ ಪಂಚಾಯತ್ ರಾಜ್ ವ್ಯವಸ್ಥೆಗೆ ಹೆಗಡೆಯವರ ಮಾದರಿಯೇ ಪ್ರೇರಣೆಯಾಗಿತ್ತು. ಇನ್ನು ಬಂಜರು, ಒಣಭೂಮಿ ಅಭಿವೃದ್ಧಿ ವಿಚಾರಕ್ಕೆ ಬರೋಣ. ರಾಜ್ಯದ ಒಟ್ಟಾರೆ ಪರಿಸ್ಥಿತಿಯನ್ನು ಗಮನಿಸಿದರೆ ಶೇ.20ರಷ್ಟು ಭೂಮಿಗೆ ಮಾತ್ರ ನೀರಾವರಿ ಅನುಕೂಲವಿತ್ತು. ಉಳಿದ 80 ಪರ್ಸೆಂಟ್ ಜಾಗವನ್ನೂ ಸದುಪಯೋಗಪಡಿಸಿಕೊಳ್ಳುವ ಸಲುವಾಗಿ ವೇಸ್ಟ್ ಲ್ಯಾಂಡ್ ಡೆವೆಲಪ್್ಮೆಂಟ್ ಆ್ಯಕ್ಟಿವಿಟಿಗೆ ಚಾಲನೆ ನೀಡಿದರು. ಅಂದರೆ ತೋಟಗಾರಿಕೆ ಬೆಳೆ, ಫಾರೆಸ್ಟ್, ಡ್ರೈಕ್ರಾಪ್್ಗಳಿಗೆ ಉತ್ತೇಜನ ಕೊಟ್ಟರು. ಪ್ರತಿ ಜಿಲ್ಲೆಗೊಂದರಂತೆ ತೋಟಗಾರಿಕಾ ನಿಗಮ ಸ್ಥಾಪನೆ ಮಾಡಿದರು. ಇದರಿಂದ ಪ್ರೇರಿತರಾದ ರಾಜೀವ್ ಗಾಂಧಿಯವರು ನ್ಯಾಷನಲ್ ಹಾರ್ಟಿಕಲ್ಚರ್ ಬೋರ್ಡ್ ಸ್ಥಾಪನೆ ಮಾಡಿದರು.

ನಿಜಕ್ಕೂ ಅವರೊಬ್ಬ ಪ್ರೇರಣಾದಾಯಿಕ ನಾಯಕ!

ಉತ್ತರ ಕರ್ನಾಟಕದಲ್ಲಿ ಲಿಂಗಾಯತರದ್ದೇ ಪ್ರಾಬಲ್ಯವಿದ್ದರೂ ಅವರು ತಮ್ಮ ಜಾತಿ ನಾಯಕರಿಗಿಂತ ಹೆಗಡೆಯವರ ಮೇಲೆ ಹೆಚ್ಚು ವಿಶ್ವಾಸವಿಟ್ಟಿದ್ದರು, ಗೌರವ ಹೊಂದಿದ್ದರು. ಅವರಲ್ಲಿದ್ದ ಮೇನೇಜಿರಿಯಲ್ ಸ್ಕಿಲ್ ಅನ್ನು ಈಗಿನವರು ಕಲಿಯಬೇಕು. ಲಿಂಗಾಯತರು, ಒಕ್ಕಲಿಗರನ್ನು ಸಂಭಾಳಿಸುವ ಜತೆಗೆ ಬಿ. ಸೋಮಶೇಖರ್, ರಾಚಯ್ಯ, ನಜೀರ್ ಸಾಬ್, ಪಿಜಿಆರ್ ಸಿಂಧ್ಯಾ, ಸಿದ್ಧರಾಮಯ್ಯ, ಬಿ.ರಘುಪತಿ, ಜೀವರಾಜ್ ಆಳ್ವ ಅವರಂಥ ಅನ್ಯ ಜಾತಿ, ಧರ್ಮೀಯರನ್ನೂ ಪ್ರೋತ್ಸಾಹಿಸಿದರು. ಬಹುಶಃ ಕ್ಯಾಬಿನೆಟ್ ಮೇಲೆ ಅವರಿಗಿದ್ದ ಹಿಡಿತ ಮುಂದೆ ಯಾರಲ್ಲೂ ಕಾಣಲಿಲ್ಲ ಎನ್ನಬಹುದು. ಆರೋಪ ಎದುರಾದಾಗ ದೇವೇಗೌಡ, ಜೀವಿಜಯ, ಬಿ. ಸೋಮಶೇಖರ್್ರಿಂದ ರಾಜೀನಾಮೆ ಪಡೆದು ವಿಚಾರಣೆ ಎದುರಿಸುವಂತೆ ಸೂಚಿಸಿದ ಅವರ ಎದೆಗಾರಿಕೆಯನ್ನು ಈಗಿನವರಲ್ಲಿ ಕಾಣುವುದಕ್ಕಾದರೂ ಸಾಧ್ಯವಿದೆಯೇ? ಇವತ್ತು ಎಲ್ಲರೂ ಜನಲೋಕಪಾಲ, ಲೋಕಾಯುಕ್ತದ ಬಗ್ಗೆ ಮಾತನಾಡುತ್ತಿದ್ದಾರೆ. ಆದರೆ ಲೋಕಾಯುಕ್ತ ಕಾಯಿದೆಯನ್ನು ಮೊಟ್ಟಮೊದಲಿಗೆ ಜಾರಿಗೆ ತಂದವರೇ ರಾಮಕೃಷ್ಣ ಹೆಗಡೆ ಎಂದರೆ ನಂಬುತ್ತೀರಾ?

ಆಡಳಿತದಲ್ಲಿ ಭ್ರಷ್ಟಾಚಾರವನ್ನು ಹತ್ತಿಕ್ಕುವ ಸಲುವಾಗಿ ಲೋಕಾಯುಕ್ತವನ್ನು ಜಾರಿಗೆ ತಂದಿದ್ದು ಮಾತ್ರವಲ್ಲ, ‘ಖ್ಡ್ಟ ಟ್ಟಡ್ಟಿ’ (ಸ್ವ ಇಚ್ಛೆಯಿಂದ ಪ್ರಕರಣ ದಾಖಲಿಸಿಕೊಳ್ಳುವ ಅಧಿಕಾರ) ಪವರ್ ಕೊಟ್ಟರು! ಕೊನೆಗೆ ಪಕ್ಷದೊಳಗೆ ಎದುರಾದ ಭಾರೀ ಒತ್ತಡಕ್ಕೆ ಮಣಿದು ಅದನ್ನು ಹಿಂತೆಗೆದುಕೊಂಡಿದ್ದು ಬೇರೆ ಮಾತು. ಆದರೆ ಹೆಗಡೆಯವರಲ್ಲಿದ್ದ ಪ್ರಾಮಾಣಿಕ ಕಾಳಜಿಯನ್ನು ಮರೆಯಲು ಸಾಧ್ಯವಿಲ್ಲ. ಎ.ಡಿ. ಕೌಶಲ್ ಮೊದಲ ಲೋಕಾಯುಕ್ತರಾಗಿ ನೇಮಕಗೊಂಡರು. ಮಂತ್ರಿಗಳನ್ನು ವಿಚಾರಣೆ ನಡೆಸುವ ಅಧಿಕಾರವನ್ನು ಲೋಕಾಯುಕ್ತಕ್ಕೆ ಕೊಡಲಾಯಿತು. ಇಲ್ಲಿ ಗಮನಿಸಬೇಕಾದ ಮತ್ತೊಂದು ಗಮನಾರ್ಹ ಅಂಶವೆಂದರೆ ಸ್ವಜನಪಕ್ಷಪಾತ, ಪ್ರಭಾವಗಳಿಂದ ಲೋಕಾಯುಕ್ತವನ್ನು ದೂರವಿಡುವ ಸಲುವಾಗಿ ಲೋಕಾಯುಕ್ತರಾಗಿ ಅನ್ಯರಾಜ್ಯದ ನ್ಯಾಯಾಧೀಶರನ್ನು ನೇಮಕ ಮಾಡುವ ಸಂಪ್ರದಾಯ ಆರಂಭಿಸಿದರು ಹೆಗಡೆ. ಇದನ್ನು ಮುರಿದಿದ್ದು ಎಚ್.ಡಿ. ದೇವೇಗೌಡ. ಕೇವಲ ಒಂದು ದಿನದ ಮಟ್ಟಿಗೆ ನಮ್ಮ ರಾಜ್ಯ ಹೈಕೋರ್ಟ್್ನ ಮುಖ್ಯ ನ್ಯಾಯಾಧೀಶರಾಗಿದ್ದ ಹಕೀಂ ಅವರನ್ನು ಲೋಕಾಯುಕ್ತರನ್ನಾಗಿ ಮಾಡಿದ ದೇವೇಗೌಡರು, ಒಂದು ರೀತಿಯಲ್ಲಿ ಲೋಕಾಯುಕ್ತ ಸಂಸ್ಥೆಯನ್ನೂ ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆಗೆ ದಾರಿ ಮಾಡಿಕೊಟ್ಟರು. ರಾಮಕೃಷ್ಣ ಹೆಗಡೆಯವರು ಎಂತಹ ವ್ಯಕ್ತಿಯೆಂದರೆ ಮೆಡಿಕಲ್ ಸೀಟು(ಎಂಡಿ) ಕೊಡಿಸಿದ್ದಕ್ಕೆ ಪ್ರತಿಯಾಗಿ ಲಂಚಪಡೆದುಕೊಳ್ಳಲಾಗಿದೆ ಎಂದು ಎ.ಕೆ. ಸುಬ್ಬಯ್ಯನವರು ಆರೋಪ ಮಾಡಿದಾಗ ಸ್ವಂತ ಮಗನ ವಿರುದ್ಧವೇ ನ್ಯಾಯಾಂಗ ತನಿಖೆಗೆ ಆದೇಶ ಮಾಡಿದರು. ಹಾಗೆ ಮಾಡಿದ ದೇಶದ ಮೊದಲ ಹಾಗೂ ಏಕೈಕ ಮುಖ್ಯಮಂತ್ರಿ ಅವರು! ಅವರ ಸಹೋದರ ಗಣೇಶ್ ಹೆಗಡೆ ಅಂತರ್್ರಾಜ್ಯ ಅಕ್ಕಿ ಸಾಗಾಣೆ, ದಾಸ್ತಾನಿನಲ್ಲಿ ಭಾಗಿಯಾಗಿದ್ದಾರೆ ಎಂದು ಆರೋಪಿಸಿದಾಗ ಒಡಹುಟ್ಟಿದವನ ವಿರುದ್ಧವೂ ತನಿಖೆ ಮಾಡಿಸಿದರು.

ಹೀಗೆ ಆಡಳಿತದಲ್ಲಿ ಮೌಲ್ಯಾಧಾರಿತ ನಿಲುವು, ನಿರ್ಧಾರಗಳನ್ನು ತೆಗೆದುಕೊಂಡರು!

ಇದು ಆಡಳಿತ ಹಾಗೂ ಜನಮಾನಸದಲ್ಲಿ ಒಳ್ಳೆಯ ಪರಿಣಾಮ ಬೀರಿತು. ಹಾಗಾಗಿ ಹೆಗಡೆ ಆಡಳಿತದ ಬಗ್ಗೆ ಜನರಲ್ಲಿ ಒಳ್ಳೆಯ ಇಂಪ್ರೆಷನ್ ಬಂತು. ಅವರ ಆಡಳಿತದಲ್ಲಿ ಜಾರಿಗೆ ಬಂದ ಸಮಗ್ರ ಶಿಕ್ಷಣ ಕಾಯಿದೆಯನ್ನು ಮರೆಯಲು ಸಾಧ್ಯವೆ? ಇವತ್ತು ನಾವು ಕಾಣುವ ಸಿಇಟಿ ಮತ್ತು ಅದರ ಮೂಲಕ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ದೊರೆಯುತ್ತಿರುವ ಉಚಿತ ಸೀಟು ಸೌಲಭ್ಯಕ್ಕೆ ಹೆಗಡೆಯವರ ಜನತಾ ಸರ್ಕಾರ ಜಾರಿಗೆ ತಂದ ಈ ಕಾಯಿದೆಯೇ ಕಾರಣ. ರಾಷ್ಟ್ರದಲ್ಲೇ ಮೊದಲ ಬಾರಿಗೆ ರ್ಯಾಗಿಂಗ್ ನಿಷೇಧ ಮಾಡಲಾಯಿತು. ಅದನ್ನು ಕ್ರಿಮಿನಲ್ ಅಪರಾಧ ಎಂದು ಘೋಷಿಸಲಾಯಿತು. 1985ರಲ್ಲಿ ಕ್ಯಾಪಿಟೇಷನ್ ಫೀ ಅನ್ನು ನಿಷೇಧ ಮಾಡಿದ್ದು ದೇಶದಲ್ಲೇ ಪ್ರಥಮ. ಗುಂಡೂರಾವ್ ಕಾಲದಲ್ಲಿ ಆರಂಭವಾಗಿದ್ದ ಗೂಂಡಾಗಿರಿಯನ್ನು ಮಟ್ಟಹಾಕಿದ್ದು, ಆಲ್ಟರ್ನೇಟಿವ್ ವಾಟರ್ ಸೋರ್ಸಸ್ ಅಂದರೆ ಬಾವಿ ಬದಲು ವ್ಯಾಪಕವಾಗಿ ಬೋರ್ ನಿರ್ಮಾಣ ಕಾರ್ಯ ಆರಂಭಿಸಿದ್ದೂ ಹೆಗಡೆಯವರ ಆಡಳಿತದಲ್ಲೇ. ಜತೆಗೆ ಐಎಎಸ್ ಅಧಿಕಾರಿಗಳಿಗೆ ಸ್ವತಂತ್ರವಾಗಿ ಕಾರ್ಯನಿರ್ವಹಿಸಲು ಅನುವು ಮಾಡಿಕೊಡುವ ಮೂಲಕ ಒಳ್ಳೆಯ ಆಡಳಿತ ಕೊಡುವುದಕ್ಕೂ ಪ್ರಯತ್ನಿಸಿದರು, ಪಂಚಾಯತ್ ರಾಜ್ ಮೂಲಕ ಅಧಿಕಾರ ವಿಕೇಂದ್ರೀಕರಣಕ್ಕೂ ದಾರಿ ಮಾಡಿಕೊಟ್ಟರು. ಆಗಿನ ಕಾಲದಲ್ಲಿ ಈಗಿನಂತೆ ಹಣಬಲ, ತೋಳ್ಬಲದ ಪ್ರಭಾವ ಇರಲಿಲ್ಲ ಅಂದುಕೊಳ್ಳಬೇಡಿ. ಈಗಿನ ಗಣಿಧಣಿಗಳಂತೆ ಆಗ ಖೋಡೆ, ಕೇಶವಲು ರೂಪದಲ್ಲಿ ಹೆಂಡದ ದೊರೆಗಳಿದ್ದರು. ಆದರೆ ಹೆಗಡೆಯವರು ಅವರನ್ನೆಂದೂ ತೊಡೆಮೇಲೆ ಕೂರಿಸಿಕೊಳ್ಳಲಿಲ್ಲ.

ಹಾಗಂತ ಹೆಗಡೆಯವರಲ್ಲಿ ದೌರ್ಬಲ್ಯಗಳೇ ಇರಲಿಲ್ಲವೆಂದಲ್ಲ. ಸದ್ಗುಣಗಳ ಜತೆ ಕೆಲ ದೌರ್ಬಲ್ಯ, ಚಾಲಾಕಿತನಗಳು ಸೇರಿಕೊಂಡಿದ್ದವು. ಒಬ್ಬ ಚತುರ ರಾಜಕಾರಣಿಯಂತೆಯೇ ರೈತ ಹಾಗೂ ದಲಿತ ಸಂಘಟನೆಗಳ ಸದ್ದಡಗಿಸಿದರು. ಸಿದ್ದಲಿಂಗಯ್ಯನವರನ್ನು ಎಂಎಲ್್ಸಿ ಮಾಡಿದರೆ, ದೇವನೂರು ಮಹಾದೇವ ಅವರ ಸಹೋದರ ದೇವನೂರ ಶಿವಮಲ್ಲರನ್ನು ರಾಜಕಾರಣಕ್ಕೆ ತಂದು ವಯಸ್ಕ ಶಿಕ್ಷಣ ಮಂಡಳಿಯ ಅಧ್ಯಕ್ಷರನ್ನಾಗಿ ಮಾಡಿ ದಲಿತರನ್ನು ಒಡೆದರು. ಒಬ್ಬ ರಾಜನಂತೆಯೇ ಹೆಣ್ಣು-ಹೊನ್ನು-ಮಣ್ಣು ಇವುಗಳಲ್ಲಿ ಕೆಲವನ್ನು ಬಹುವಾಗಿ ಆಳಿದರು!

ಆದರೂ ಒಬ್ಬ ಮುಖ್ಯಮಂತ್ರಿಯಾಗಿ ಅವರು ಮಾಡಿದ ಕಾರ್ಯಗಳು ಮುಂದಿನ ಹಲವು ತಲೆಮಾರು ನೆನಪಿನಲ್ಲಿಟ್ಟುಕೊಳ್ಳುವಂಥವಾಗಿದ್ದವು. ಅವರಂಥ ಸೂಕ್ಷ್ಮಜೀವಿ, ಸಂವೇದನಾಶೀಲ ವ್ಯಕ್ತಿ ಮತ್ತೆ ಕರ್ನಾಟಕದ ಮುಖ್ಯಮಂತ್ರಿಯಾಗಲಿಲ್ಲ ಎಂದರೂ ತಪ್ಪಾಗುವುದಿಲ್ಲ. ಇಂತಹ ರಾಮಕೃಷ್ಣ ಹೆಗಡೆಯವರು ಜನಿಸಿದ್ದು 1926, ಆಗಸ್ಟ್ 29ರಂದು. ಅವರಿದ್ದಿದ್ದರೆ 85 ತುಂಬುತ್ತಿತ್ತು. ಪ್ರಸ್ತುತ ಹೊಲಸೆದ್ದಿರುವ ರಾಜಕಾರಣವನ್ನು ಕಂಡಾಗ ಹೆಗಡೆ ನೆನಪಾದರು.

ಕೃಪೆ: ಪ್ರತಾಪ ಸಿಂಹ

ಸೋಮವಾರ, ಆಗಸ್ಟ್ 29, 2011

ಚಾರಿತ್ರ್ಯವಧೆ, ಇದು ಅವರ ಮಾಮೂಲಿ ದಂಧೆ!

ಅಣ್ಣಾ ಹಜಾರೆ ನಿಜಕ್ಕೂ ಭ್ರಷ್ಟ ವ್ಯಕ್ತಿಯೇ? ಅವರು ಸದಸ್ಯರಾಗಿರುವ ಹಿಂದ್ ಸಮಾಜ್ ಸ್ವಯಂ ಸೇವಾ ಸಂಸ್ಥೆ ನಿಜಕ್ಕೂ ನಿಧಿ ದುರ್ಬಳಕೆ ಮಾಡಿಕೊಂಡಿದೆಯೇ? 2003ರಲ್ಲಿ ನೀಡಲಾದ ನ್ಯಾಯಮೂರ್ತಿ ಸಾವಂತ್ ಸಮಿತಿ ವರದಿಯಲ್ಲಿ ಅಣ್ಣಾ ಹಜಾರೆ ಮೇಲೆ ದೋಷಾರೋಪಣೆ ಮಾಡಿರುವುದು ನಿಜವೇ? ಅಣ್ಣಾನನ್ನೇ ಕಟಕಟೆಗೆ ತಂದು ನಿಲ್ಲಿಸಲಾಗಿದೆಯೇ?

ಅಥವಾ

ಕಾಂಗ್ರೆಸ್ ನಡೆಸುತ್ತಿರುವ ಹುನ್ನಾರ ಇದಾಗಿದೆಯೇ? ಅಣ್ಣಾನ ವಿರುದ್ಧ ಕಾಂಗ್ರೆಸ್ ಪಿತೂರಿ ಮಾಡುತ್ತಿದೆಯೇ? ಅಣ್ಣಾನ ಪ್ರತಿಭಟನೆ ಹಿಂದೆ ಅಮೆರಿಕವಿದೆ ಎಂಬ ಮಧ್ಯಪ್ರದೇಶ ಕಾಂಗ್ರೆಸ್ ಅಧ್ಯಕ್ಷ ರಶೀದ್ ಆಳ್ವಿ ಮಾತು ಅಣ್ಣಾನ ಮೇಲೆ ಕಳಂಕ ತರುವ ಪ್ರಯತ್ನವಾಗಿದೆಯೇ? ತನ್ನ ವಿರುದ್ಧ ಧ್ವನಿ ಎತ್ತುವವರ ವಿರುದ್ಧ ಕಾಂಗ್ರೆಸ್ ಏಕಿಂಥ ನೀಚ ಪ್ರಚಾರಾಂದೋಲನ ಮಾಡುತ್ತದೆ? ಮನೀಶ್ ತಿವಾರಿ, ದಿಗ್ವಿಜಯ್ ಸಿಂಗ್, ಬಿ.ಕೆ. ಹರಿಪ್ರಸಾದ್ ಮುಂತಾದ ಕಾಂಗ್ರೆಸ್ ನೇತಾರ, ವಕ್ತಾರರು ಏಕಾಗಿ ದೋಷಾರೋಪ ಮಾಡುತ್ತಿದ್ದಾರೆ? ಇಂಥದ್ದೊಂದು ಚಾರಿತ್ರ್ಯವಧೆ ಮಾಡುವ ಕಾರ್ಯ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿಯವರ ಪೂರ್ವಾನುಮತಿ ಇಲ್ಲದೆ ನಡೆಯಲು ಸಾಧ್ಯವಾದರೂ ಇದೆಯೇ?

ಅದು 1975, ಜೂನ್ 12.

ಅಂದು ಅಲಹಾಬಾದ್ ಹೈಕೋರ್ಟ್ 1971ರಲ್ಲಿ ಇಂದಿರಾ ಗಾಂಧಿಯವರು ಲೋಕಸಭೆಗೆ ಆಯ್ಕೆಯಾಗಿದ್ದನ್ನು ಅನೂರ್ಜಿತಗೊಳಿಸಿ ಐತಿಹಾಸಿಕ ತೀರ್ಪು ನೀಡಿತು. ಅದನ್ನು ಗೌರವಯುತವಾಗಿ ಒಪ್ಪಿಕೊಳ್ಳುವ ಬದಲು ರಾಷ್ಟ್ರದಲ್ಲಿ ಆಂತರಿಕ ಬಿಕ್ಕಟ್ಟು ಸೃಷ್ಟಿಯಾಗಿದೆ ಎಂಬ ನೆಪವೊಡ್ಡಿದ ಇಂದಿರಾ ಗಾಂಧಿಯವರು ಜೂನ್ 25ರಂದು ದೇಶದ ಮೇಲೆ ತುರ್ತುಪರಿಸ್ಥಿತಿಯನ್ನು ಹೇರಿದರು. ಆ ಸಂದರ್ಭದಲ್ಲಿ ಕಾಂಗ್ರೆಸ್ಸೇತರ ಪಕ್ಷಗಳೆಲ್ಲ ಒಗ್ಗೂಡಿ ಮರಳಿ ಸ್ವಾತಂತ್ರ್ಯ ಗಳಿಸಿಕೊಳ್ಳುವ ಹೋರಾಟಕ್ಕೆ ಧುಮುಕಿದವು. ತುರ್ತುಪರಿಸ್ಥಿತಿ ಹೇರಿದ ಬೆನ್ನಲ್ಲೇ ನಮ್ಮ ರಾಜಧಾನಿ ದಿಲ್ಲಿಯಲ್ಲಿ ಕಾಮನ್ವೆಲ್ತ್ ರಾಷ್ಟ್ರಗಳ ಸಂಸತ್ ಪ್ರತಿನಿಧಿಗಳ ಅಂತಾರಾಷ್ಟ್ರೀಯ ಶೃಂಗ ಏರ್ಪಾಡಾಯಿತು. ಆ ಸಂದರ್ಭದಲ್ಲಿ ಕೈಪಿಡಿಗಳನ್ನು ಹೊರತಂದು, ಸಂದಸರಿಗೆ ಹಂಚುವ ಮೂಲಕ ಇಂದಿರಾ ಗಾಂಧಿಯವರ ನಿಜರೂಪವನ್ನು ಬಯಲು ಮಾಡಲು ಮುಂದಾಯಿತು ಜನಸಂಘ (ಈಗ ಬಿಜೆಪಿ). ಒಂದರ ಮೇಲೆ ಒಂದರಂತೆ ಸುಳ್ಳಿನ ಕಂತೆಗಳನ್ನೇ ಸೃಷ್ಟಿಸುತ್ತಿದ್ದ ಇಂದಿರಾ ಗಾಂಧಿಯವರನ್ನುದ್ದೇಶಿಸಿ ಒಂದು ಪ್ರಶ್ನೆ ಮಾಲೆಯನ್ನೂ ಸಿದ್ಧಪಡಿಸಲಾಯಿತು. ಅದರ ಕರಡು ಪ್ರತಿಯನ್ನು ತೆಗೆದುಕೊಂಡು ಪಕ್ಷದ ವರಿಷ್ಠ ನೇತಾರ ಅಟಲ್ ಬಿಹಾರಿ ವಾಜಪೇಯಿಯವರ ಬಳಿಗೆ ಹೋಗಲಾಯಿತು. ಪ್ರತಿಯೊಂದು ಪ್ರಶ್ನೆಗಳ ಮೇಲೂ ಕಣ್ಣಾಡಿಸಿದ ವಾಜಪೇಯಿ ಯಾವುದೇ ತಿದ್ದುಪಡಿ ಮಾಡದೆ ಎಲ್ಲವಕ್ಕೂ ಸಮ್ಮತಿಯ ತಲೆಯಾಡಿಸಿದರು. ಇನ್ನೇನು ಕರಡು ಪ್ರತಿಯನ್ನು ಮರಳಿ ಕೊಡಬೇಕು, ಅಷ್ಟರಲ್ಲಿ ಪೆನ್ನು ಕೈಗೆತ್ತಿಕೊಂಡ ಅಟಲ್ ಪ್ರಶ್ನೆಮಾಲೆಯ ಶೀರ್ಷಿಕೆಯಾದ ‘ಇಂದಿರಾ ಜವಾಬ್ ದೋ’ಗೆ ಒಂದು ಸಣ್ಣ ತಿದ್ದುಪಡಿ ಮಾಡಿದರು. ಅದು ಏನೆಂದುಕೊಂಡಿರಿ?

‘ಇಂದಿರಾಜಿ ಜವಾಬ್ ದೀಜಿಯೇ’!

ಇಡೀ ದೇಶದ ಮೇಲೆ ತುರ್ತು ಪರಿಸ್ಥಿತಿ ಹೇರುವ ಮೂಲಕ ನೂರೈವತ್ತು ವರ್ಷಗಳ ಕಾಲ ಹೋರಾಡಿ, ಲಕ್ಷಾಂತರ ಜನ ಪ್ರಾಣಕೊಟ್ಟು ಗಳಿಸಿದ್ದ ಸ್ವಾತಂತ್ರ್ಯವನ್ನು ಹರಣ ಮಾಡಿದ್ದಾಕೆಯನ್ನು ಸಂಬೋಧಿಸುವಾಗಲೂ ಸಭ್ಯತೆ, ಗೌರವಾದರಗಳನ್ನು ಕೊಡಬೇಕು ಎಂಬ ಪಾಠ ವಾಜಪೇಯಿ ಅವರ ತಿದ್ದುಪಡಿಯಲ್ಲಿತ್ತು! ಅಂತಹ ವ್ಯಕ್ತಿಗೆ ಕಾಂಗ್ರೆಸ್ ಪ್ರತಿಯಾಗಿ ನೀಡಿದ್ದೇನು?

ಗದ್ದಾರ್, ದೇಶದ್ರೋಹಿ ಎಂಬ ಪಟ್ಟ!

1999ರಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆ ಸಂದರ್ಭದಲ್ಲಿ ಉಜ್ಜಯಿನಿಯಲ್ಲಿ ನಡೆದ ಪ್ರಚಾರಾಂದೋಲನವನ್ನುದ್ದೇಶಿಸಿ ಮಾತನಾಡುತ್ತಾ, ‘ಹಿಂದುಸ್ಥಾನ್ ಕೆ ಸಾಥ್ ಗದ್ದಾರಿ ಕೀ, ಜನತಾ ಕೇ ಸಾಥ್ ಗದ್ದಾರಿ ಕೀ…’ ಎಂದು ಸೋನಿಯಾ ಗಾಂಧಿಯವರು ಅಟಲ್ ವಿರುದ್ಧ ಕೀಳಾಗಿ ಮಾತನಾಡಿದರು! ಈ ನಡುವೆ 1942ರಲ್ಲಿ ಬಂಧನಕ್ಕೊಳಗಾಗಿದ್ದ ವೇಳೆ ಅಟಲ್ ಬ್ರಿಟಿಷರ ಕ್ಷಮೆಯಾಚಿಸಿದ್ದರು ಎಂಬ ಗಂಭೀರ ಆರೋಪವನ್ನೂ ಮಾಡಲಾಯಿತು! ಒಂದು ರಾಷ್ಟ್ರೀಯ ಪಕ್ಷದ, ಅದೂ 45 ವರ್ಷ ದೇಶವಾಳಿದ್ದ ಪಾರ್ಟಿಯ ಅಧ್ಯಕ್ಷೆಯಾಗಿ ಸೋನಿಯಾ ಗಾಂಧಿಯವರು ಆಡಬಹುದಾದ ಮಾತುಗಳೇ ಅವು? ಪಕ್ಷದ ನಾಯಕಿ, ವರಿಷ್ಠ ನೇತಾರೆಯ ಬಾಯಿಂದ ಇಂತಹ ಕೀಳು ಶಬ್ದಗಳು, ಕೊಳಕು ಆರೋಪಗಳು ಹೊರಡಬಹುದಾದರೆ ಅವರ ಪಕ್ಷದ ಇತರ ನಾಯಕರಿಂದ ಏನು ಒಳ್ಳೆಯದನ್ನು ನಿರೀಕ್ಷಿಸಲು ಸಾಧ್ಯ? ಅವತ್ತು ಅಟಲ್ ಎಷ್ಟು ದಿಗ್ಭ್ರಾಂತರಾಗಿದ್ದರೆಂದರೆ, ‘ನನಗೆ ಸೋನಿಯಾ ಗಾಂಧಿಯವರಂತೆ ಮಾತನಾಡಲು ಬರುವುದಿಲ್ಲ, ಸೋನಿಯಾ ಮಟ್ಟಕ್ಕೆ ಇಳಿಯಲು ಆಗುವುದಿಲ್ಲ. ಪ್ರಜಾಪ್ರಭುತ್ವದಲ್ಲಿ ಆರೋಪ-ಪ್ರತ್ಯಾರೋಪಗಳು ಸಹಜ. ಆದರೆ ಭಾಷೆ ಸಭ್ಯವಾಗಿರಬೇಕು’ ಎಂದು ಸುಮ್ಮನಾಗಿ ಬಿಟ್ಟರು. ಸೋನಿಯಾ ಗಾಂಧಿಯವರ ಅತ್ತೆಯ ಅಪ್ಪ ಚೀನಾದ ವಿರುದ್ಧ ಭಾರತ ಹೀನಾಯವಾಗಿ ಸೋತು, ಅವಮಾನಕ್ಕೊಳಗಾಗುವವಂತೆ ಮಾಡಿದ ಸಂದರ್ಭದಲ್ಲೂ ಯಾರೂ ನೆಹರು ಅವರನ್ನು ದೇಶದ್ರೋಹಿ ಎಂದಿರಲಿಲ್ಲ. ಆದರೆ ಕಾರ್ಗಿಲ್ ಯುದ್ಧದಲ್ಲಿ ಶತ್ರುಗಳನ್ನು ಮಟ್ಟಹಾಕಿದ ಅಟಲ್ ಬಿಹಾರಿ ವಾಜಪೇಯಿಯವರಂಥ ಮಹಾನ್ ನಾಯಕನನ್ನು ದೇಶದ್ರೋಹಿ ಎಂದು ಕರೆದರು ಈ ಸೋನಿಯಾ ಗಾಂಧಿ. ಹಾಗಿರುವಾಗ ಅಣ್ಣಾ ಹಜಾರೆಯವರನ್ನು ಅಮೆರಿಕದ ಏಜೆಂಟ್, ಭ್ರಷ್ಟಾಚಾರಿ ಎಂದು ಮನೀಶ್ ತಿವಾರಿ, ದಿಗ್ವಿಜಯ್ ಸಿಂಗ್, ರಶೀದ್ ಆಳ್ವಿ ಕರೆಯುವುದರಲ್ಲಿ ಯಾವ ಆಶ್ಚರ್ಯವಿದೆ? ‘ಹಿರಿಯಕ್ಕನ ಚಾಳಿ ಮನೆಮಂದಿಗೆಲ್ಲ’ ಎಂಬಂತೆ ಸೋನಿಯಾ ಗಾಂಧಿಯವರ ಬಾಲಬಡುಕರಿಂದ ಇಂತಹ ಚಾರಿತ್ರ್ಯವಧೆ ಮಾಡುವ ಕಾರ್ಯವನ್ನಲ್ಲದೆ ಮತ್ತೀನ್ನೇನನ್ನು ನಿರೀಕ್ಷಿಸಲು ಸಾಧ್ಯ?

ಇಷ್ಟಕ್ಕೂ ಭ್ರಷ್ಟ ಎಂದು ಕರೆಯಲು ಅಣ್ಣಾ ಮಾಡಿದ ಕೆಲಸವಾದರೂ ಏನು?

1998-99ನೇ ಸಾಲಿನಲ್ಲಿ ಅಣ್ಣಾ ಹಜಾರೆಯವರ 60ನೇ ಜನ್ಮದಿನ ಆಚರಣೆಗಾಗಿ ಅಣ್ಣಾ ಸದಸ್ಯರಾಗಿರುವ ಹಿಂದ್ ಸಮಾಜ್ ಟ್ರಸ್ಟ್್ನಿಂದ 2 ಲಕ್ಷದ 20 ಸಾವಿರ ರೂ.ಗಳನ್ನು ತಾತ್ಕಾಲಿಕವಾಗಿ ಬಳಕೆ ಮಾಡಿಕೊಳ್ಳಲಾಗಿತ್ತು. ಇದರ ಬಗ್ಗೆ ಉಲ್ಲೇಖಿಸುತ್ತಾ ನ್ಯಾಯಮೂರ್ತಿ ಸಾವಂತ್ ಸಮಿತಿ, ‘ಹಣದ ಲೆಕ್ಕಾಚಾರ ಸಮರ್ಪಕವಾಗಿಲ್ಲ’ ಎಂದಿತು ತನ್ನ ವರದಿಯಲ್ಲಿ. ಅಂದಮಾತ್ರಕ್ಕೇ ಅಣ್ಣಾ ಭ್ರಷ್ಟ ವ್ಯಕ್ತಿಯಾಗಿ ಬಿಡುತ್ತಾರಾ? ಅಣ್ಣಾ ಬಗ್ಗೆ ವರದಿಯ ಯಾವ ಭಾಗದಲ್ಲಿ ವೈಯಕ್ತಿಕ ಆರೋಪ ಮಾಡಲಾಗಿದೆ ಹೇಳಲಿ? ಸ್ವಂತ ಮನೆಯಿಲ್ಲ, ಹೆಂಡತಿ ಮಕ್ಕಳಿಲ್ಲ, ಬಂಧುಬಳಗದಿಂದಲೂ ದೂರಾಗಿ ದೇವಸ್ಥಾನದ ಜಗುಲಿಯಲ್ಲಿ ಮಲಗುವ ವ್ಯಕ್ತಿಯನ್ನು ಯಾವ ಬಾಯಲ್ಲಿ ಭ್ರಷ್ಟ ಎನ್ನುತ್ತಾರೆ? ಏನಾಗಿದೆ ಈ ಕಾಂಗ್ರೆಸ್ಸಿಗರಿಗೆ? ಮೇಡಂ ಸೋನಿಯಾ ಗಾಂಧಿಯವರ ಅನುಮತಿಯಿಲ್ಲದೆ ಕಾಂಗ್ರೆಸ್ಸಿಗರು ಇಂತಹ ಕಳಂಕ ತರುವ ಕಾರ್ಯಕ್ಕೆ ಕೈಹಾಕಿಯಾರೆ?

ಇಷ್ಟಕ್ಕೂ ಸೋನಿಯಾ ಸಮ್ಮತಿ ಇಲ್ಲದೆ ಒಂದು ವಸ್ತುವನ್ನು ಕದಲಿಸಲು ಸಾಧ್ಯವಿದೆಯೇ?

ಯುಪಿಎ-1 ಸರ್ಕಾರವನ್ನು ತೆಗೆದುಕೊಳ್ಳಿ. ಹೈದರಾಬಾದ್, ಮುಂಬೈ(ರೈಲು ದಾಳಿ), ಬೆಂಗಳೂರು, ಅಹ್ಮದಾಬಾದ್, ಜೈಪುರ್ ಹೀಗೆ ಒಂದರ ಹಿಂದೆ ಒಂದರಂತೆ ಸರಣಿ ಬಾಂಬ್ ಸ್ಫೋಟಗಳು ಸಂಭವಿಸಿದವು. ಗೃಹ ಸಚಿವ ಶಿವರಾಜ್ ಪಾಟೀಲರ ಕಾರ್ಯದಕ್ಷತೆ ಬಗ್ಗೆ ಅನುಮಾನ, ಅಸಮರ್ಥತೆ ಬಗ್ಗೆ ಭಾರೀ ಟೀಕೆಗಳು ಕೇಳಿಬಂದವು. ಹೀಗೆ ರಾಜೀನಾಮೆ ನೀಡಬೇಕೆಂಬ ಒತ್ತಡ ಸೃಷ್ಟಿಯಾದಾಗಲೂ ಶಿವರಾಜ್ ಪಾಟೀಲ್ ಕೊಟ್ಟ ಸಮಜಾಯಿಷಿ ಏನು ಗೊತ್ತೆ?- “I have the blessings of my leader’! ಯಾರು ಅವರ ನಾಯಕರಾಗಿದ್ದರು? ಸೋನಿಯಾ ಗಾಂಧಿಯವರಲ್ಲವೆ? 2008, ನವೆಂಬರ್ 26ರಂದು ಮುಂಬೈ ಮೇಲೆ ಮತ್ತೊಂದು ಭೀಕರ ದಾಳಿ ನಡೆಯುವವರೆಗೂ ಶಿವರಾಜ್ ಪಾಟೀಲ್ ಗೃಹಮಂತ್ರಿಯಾಗಿ ಮುಂದುವರಿದಿದ್ದು ಸೋನಿಯಾ ಗಾಂಧಿಯವರ ಆಶೀರ್ವಾದ ಹೊಂದಿದ್ದ ಕಾರಣಕ್ಕಲ್ಲವೆ? ಮಹಾರಾಷ್ಟ್ರದ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ಕೊಡಬೇಕಾಗಿ ಬಂದ ಮತ್ತೊಬ್ಬ ಅಸಮರ್ಥ ವ್ಯಕ್ತಿ ವಿಲಾಸ್ ರಾವ್ ದೇಶ್್ಮುಖ್ ಇವತ್ತು ಕೇಂದ್ರ ಕ್ಯಾಬಿನೆಟ್ ಸಚಿವರಾಗಿದ್ದರೆ ಅದರ ಹಿಂದಿರುವುದೂ ಸೋನಿಯಾ ಕೃಪೆಯೇ. ಇನ್ನು ತೆಲಂಗಾಣ ವಿಚಾರಕ್ಕೆ ಬರೋಣ. 2004ರಿಂದಲೂ ತೆಲಂಗಾಣ ಭಾಗಕ್ಕೆ ಸೇರಿರುವ ಕಾಂಗ್ರೆಸ್ ಸಂಸದರು ಪ್ರತ್ಯೇಕ ರಾಜ್ಯ ರಚನೆಯಾಗಿಯೇ ತೀರುತ್ತದೆ ಎನ್ನುತ್ತಾ ಬಂದಿದ್ದಾರೆ. ಯಾವಾಗ ಎಂದು ಕೇಳಿದರೆ ಬರುವ ಉತ್ತರ- “Madam will decide, Madam will decide’!

ರಾಜಿನಾಮೆ ಕೊಡುವಾಗಲೂ ಸ್ಪೀಕರ್ ಬದಲು ಮೇಡಂಗೆ ಪತ್ರ ಕಳುಹಿಸುತ್ತಾರೆ. ಪ್ರತ್ಯೇಕ ತೆಲಂಗಾಣ ರಚನೆಗೆ ಒತ್ತಾಯಿಸಿ ಸಂಸತ್ ಮುಂದೆ ಧರಣಿ ಕೂತಾಗ ಹಿಡಿದುಕೊಂಡಿದ್ದ ಫಲಕದ ಮೇಲಿದ್ದಿದ್ದೂ- “Sonia Gandhi Zindabad, We want Telangana’!

ಇಂತಹ ಮನಸ್ಥಿತಿ ಹೊಂದಿರುವ ಕಾಂಗ್ರೆಸ್ಸಿಗರು ಸೋನಿಯಾ ಗಾಂಧಿಯವರ ಸಮ್ಮತಿ ಇಲ್ಲದೆ ಅಣ್ಣಾ ವಿರುದ್ಧ ಕೀಳು ಆರೋಪ ಮಾಡಲು ಸಾಧ್ಯವಿದೆಯೇ?

ಕೃಪೆ: ಪ್ರತಾಪ ಸಿಂಹ

ಅಣ್ಣಾ ಹಜಾರೆ ಅಮೆರಿಕದ ಕೈಗೊಂಬೆಯೇ?


1. ನಿಮಗೊಂದು ಪಡಿತರ ಚೀಟಿ, ಚುನಾವಣಾ ಗುರುತಿನ ಚೀಟಿ, ಜನನ ಪ್ರಮಾಣ ಪತ್ರ, ಮರಣ ಪ್ರಮಾಣ ಪತ್ರ ಅಥವಾ ಯಾವುದೇ ಸರ್ಕಾರಿ ಪ್ರಮಾಣ ಪತ್ರಗಳ, ದಾಖಲೆಗಳ ಅಗತ್ಯ ಬಿದ್ದಾಗ ನೀವು ಅರ್ಜಿ ಹಾಕಿದ 15 ದಿನದೊಳಗೆ ಸಂಬಂಧಪಟ್ಟ ಅಧಿಕಾರಿ ಅದನ್ನು ನೀಡಬೇಕು. ಒಂದು ವೇಳೆ ಆತ ವಿಳಂಬ ಮಾಡಿದರೆ ಆತನ ಮೇಲಧಿಕಾರಿ ಹೊಣೆಗಾರನಾಗಬೇಕಾಗುತ್ತದೆ. ಆತನಿಗೂ ಇಂತಿಷ್ಟು ಕಾಲಾವಧಿಯನ್ನು ನಿಗದಿ ಮಾಡಲಾಗಿರುತ್ತದೆ. ಅಷ್ಟರೊಳಗಾಗಿ ಆತನೂ ಸೂಕ್ತ ದಾಖಲೆ ಅಥವಾ ಪ್ರಮಾಣ ಪತ್ರವನ್ನು ಒದಗಿಸದಿದ್ದರೆ ಲೋಕಾಯುಕ್ತ ಅಧಿಕಾರಿಗಳು ಪ್ರಕರಣ ದಾಖಲಿಸಿಕೊಂಡು, ಕ್ರಮ ಜರುಗಿಸಲು ಅವಕಾಶವಿರಬೇಕು. ಹಾಗಾಗಿ ಎಸಿ, ಡಿಸಿ, ಎಸ್ಪಿ, ಡಿಸಿಪಿ ಮುಂತಾದ ಮೇಲ್ದರ್ಜೆಯ ಅಧಿಕಾರಿಗಳಲ್ಲದೆ ತಳಮಟ್ಟದ ಅಧಿಕಾರಶಾಹಿ ವರ್ಗವನ್ನೂ ಜನಲೋಕಪಾಲದ ವ್ಯಾಪ್ತಿಗೆ ತರಬೇಕು.

2. ಪ್ರಸ್ತುತ ಒಬ್ಬ ಭ್ರಷ್ಟ ನ್ಯಾಯಾಧೀಶನ ವಿರುದ್ಧ ಪ್ರಥಮ ಮಾಹಿತಿ(ಎಫ್್ಐಆರ್) ದಾಖಲಿಸಬೇಕಾದರೆ ಸುಪ್ರೀಂಕೋರ್ಟ್ ಮುಖ್ಯ ನ್ಯಾಯಾಧೀಶರಿಂದ ಅನುಮತಿ ಪಡೆದುಕೊಳ್ಳಬೇಕು. ಸ್ವತಂತ್ರ ಭಾರತದ 65 ವರ್ಷಗಳ ಇತಿಹಾಸದಲ್ಲಿ ಹೀಗೆ ಎಫ್್ಐಆರ್ ದಾಖಲಿಸಲು ಅನುಮತಿ ನೀಡಿರುವುದು ಕೇವಲ 2 ಬಾರಿ! ಈ ಹಿನ್ನೆಲೆ ಹಾಗೂ ನ್ಯಾಯಾಂಗದ ಭ್ರಷ್ಟಾಚಾರ ತಾರಕಕ್ಕೇರಿರುವ ಸಂದರ್ಭದಲ್ಲಿ ನ್ಯಾಯಾಂಗವನ್ನೂ 7 ಸದಸ್ಯರ ಜನಲೋಕಪಾಲದ ವ್ಯಾಪ್ತಿಗೆ ತರಬೇಕು, ಪ್ರಕರಣ ದಾಖಲಿಸಿಕೊಳ್ಳುವ ಅಧಿಕಾರ ನೀಡಬೇಕು.

3. ಲೋಕಪಾಲಕ್ಕೆ ಅನುರೂಪವಾದ ಲೋಕಾಯುಕ್ತವನ್ನು ಪ್ರತಿರಾಜ್ಯದಲ್ಲೂ ಜಾರಿಗೆ ತರಬೇಕು, ಸಮಾನ ಅಧಿಕಾರವನ್ನೂ ಕೊಡಬೇಕು.

4. ಮಹಿಳಾ ಸಹಾಯವಾಣಿ, ಅಗ್ನಿಶಾಮಕ ದಳ, ಪೊಲೀಸ್ ಸೇವೆಗಳಂತೆ ಯಾರಾದರೂ ಲಂಚ ಕೇಳಿದರೆ ಕೂಡಲೇ ಜನಲೋಕಪಾಲ ಅಧಿಕಾರಿಗಳಿಗೆ ಕರೆ ಮಾಡಿ ಸಹಾಯ ಬೇಡುವ ವ್ಯವಸ್ಥೆ ಸೃಷ್ಟಿಯಾಗಬೇಕು.

ಇಂತಹ ಕೆಲವು ನಿರ್ದಿಷ್ಟ ಬೇಡಿಕೆಗಳನ್ನಿಟ್ಟುಕೊಂಡು, ಅದಕ್ಕೆ ಗಟ್ಟಿಯಾಗಿ ಅಂಟಿಕೊಂಡು ಕಳೆದ 10 ದಿನಗಳಿಂದ ಅಣ್ಣಾ ಹಜಾರೆ ಉಪವಾಸ ಸತ್ಯಾಗ್ರಹ ಮಾಡುತ್ತಿದ್ದಾರೆ. ಒಂದು ಹೊತ್ತು ಊಟ ಬಿಟ್ಟರೂ ತಲೆನೋವು ಬರುತ್ತದೆ ಎಂದು ಬೆದರುವ ನಮ್ಮ ನಡುವೆ ಒಬ್ಬ ಅಣ್ಣಾ ಇದ್ದಾರೆ ಎಂಬುದೇ ಒಂದು ಸೌಭಾಗ್ಯ. ಎಪ್ಪತ್ಮೂರು ವರ್ಷದ ಅಣ್ಣಾ ಆಯಸ್ಸು ಇನ್ನು ಎಷ್ಟಿದೆಯೋ ಗೊತ್ತಿಲ್ಲ, ಆದರೆ ಅವರ ಬೇಡಿಕೆಯಂತೆ ಈ ಮೇಲಿನ ಅಂಶಗಳನ್ನು ಜನಲೋಕಪಾಲದ ವ್ಯಾಪ್ತಿಗೆ ತಂದರೆ ಅದರಿಂದ ಲಾಭವಾಗುವುದು ಮಾತ್ರ ಮುಂದಿನ ತಲೆಮಾರಿಗೆ. ಇಂತಹ ಅಣ್ಣಾ ಹಜಾರೆಯವರ ಬಗ್ಗೆ ಕಾಂಗ್ರೆಸ್್ನ ಮನೀಶ್ ತಿವಾರಿ, ದಿಗ್ವಿಜಯ್ ಸಿಂಗ್, ಬಿ.ಕೆ. ಹರಿಪ್ರಸಾದ್ ಅವರಂತಹ ವ್ಯಕ್ತಿಗಳು ಹರಿಹಾಯ್ದರೆ, ಅವಹೇಳನಕಾರಿ ಮಾತುಗಳನ್ನಾಡಿದರೆ ಯಾರಿಗೂ ಆಶ್ಚರ್ಯವಾಗುವುದಿಲ್ಲ. ಈ ಕಾಂಗ್ರೆಸ್ಸಿಗರಿಂದ ಏನನ್ನು ನಿರೀಕ್ಷಿಸಲು ಸಾಧ್ಯ ಎಂಬುದು ಗೊತ್ತೇ ಇದೆ.

ಆದರೆ… ದೇವನೂರು ಮಹಾದೇವ, ಡಾ. ಮರುಳ ಸಿದ್ದಪ್ಪ, ಸಿ. ದ್ವಾರಕಾನಾಥ್, ಪ್ರೊ. ರವಿವರ್ಮ ಕುಮಾರ್, ಡಾ. ಕಮಲಾ ಹಂಪನಾ ಮುಂತಾದವರು ಕಾಂಗ್ರೆಸ್ ವಕ್ತಾರರಂತೆ ಅಸಂಬದ್ಧವಾಗಿ ಮಾತನಾಡಲು, ಆರೋಪ ಮಾಡಲು ಹೊರಟರೆ ಗತಿಯೇನು? ‘ಹಜಾರೆ ಒಬ್ಬ ಹಳ್ಳಿ ಮನುಷ್ಯ. ಅವರ ಮುಗ್ಧತೆಯನ್ನು ಕೆಲವು ಹಿತಾಸಕ್ತಿಗಳು ದುರುಪಯೋಗಪಡಿಸಿಕೊಳ್ಳುತ್ತಿವೆ. ಅಮೆರಿಕದ ಫೋರ್ಡ್ ಫೌಂಡೇಶನ್ ಇಡೀ ಹೋರಾಟಕ್ಕೆ ಬೆಂಬಲ ನೀಡುತ್ತಿದೆ. ಇದೆಲ್ಲಾ ಭ್ರಷ್ಟಾಚಾರವಲ್ಲವೆ’ ಎಂದು ಪ್ರಶ್ನಿಸಿದ್ದಾರೆ ಮರುಳಸಿದ್ದಪ್ಪ. ‘ಶಾಸಕಾಂಗ, ಕಾರ್ಯಾಂಗ, ನ್ಯಾಯಾಂಗಕ್ಕೆ ಮೇಲಾಂಗವಾಗಿ ಈ ಮಸೂದೆಯೇನಾದರೂ ಜಾರಿಯಾದರೆ ಕಾರ್ಪೊರೇಟ್ ಸಂಸ್ಥೆಗಳು, ಬಹುರಾಷ್ಟ್ರೀಯ ಕಂಪನಿಗಳಿಗೆ ಕಡಿವಾಣ ಇಲ್ಲದಂತಾಗುತ್ತದೆ. ಪ್ರಜಾಪ್ರಭುತ್ವದ ಆಧಾರಸ್ತಂಭಗಳು ಇಕ್ಕಟ್ಟಿಗೆ ಸಿಲುಕಿ ಯಾರದೋ ಗುಲಾಮರಾಗಬೇಕಾಗುತ್ತದೆ’ ಎಂದು ಗುಡುಗಿದ್ದಾರೆ ದೇವನೂರು ಮಹಾದೇವ! ಇನ್ನು ಕಾನೂನಿನ ಪ್ರಖಾಂಡ ಪಂಡಿತರಾದ ರವಿವರ್ಮ ಕುಮಾರ್ ಅವರಂತೂ ‘ಬಹುಜನ ಲೋಕಪಾಲ ಮಸೂದೆ ಅಸ್ತಿತ್ವಕ್ಕೆ ಬರಬೇಕಿದೆ’ ಎಂದಿದ್ದಾರೆ. ಕಮಲಾ ಹಂಪನಾ ಅವರು, ‘ಹಜಾರೆ ಹುಟ್ಟೂರಾದ ರಾಲೆಗಾಂವ್ ಸಿದ್ಧಿಯಲ್ಲಿ ಕಳೆದ 25 ವರ್ಷಗಳಿಂದ ಪಂಚಾಯಿತಿ ಚುನಾವಣೆಗಳೇ ನಡೆದಿಲ್ಲ’ ಎಂದು ಯಾರಿಗೂ ಗೊತ್ತಿರದ ಸಂಗತಿಯನ್ನ ಹೊರಹಾಕಿದ್ದಾರೆ. ಮುಂದುವರಿದು, ರಾಜ್ ಠಾಕ್ರೆ, ಮೋದಿಯನ್ನು ಎಳೆದುತಂದು ಭಾಷಾಂಧ, ಧರ್ಮಾಂಧ ಎಂಬ ಪದಪ್ರಯೋಗಗಳನ್ನು ಮಾಡಿದ್ದಾರೆ.

ಇದು ಏನನ್ನು ಸೂಚಿಸುತ್ತದೆ?

ತಮ್ಮನ್ನು ಪ್ರಗತಿಪರರು ಎಂದು ಹೇಳಿಕೊಳ್ಳುವ ಇವರ ಬಾಯಲ್ಲಿ ಹೊರಡುವಂಥ ಮಾತುಗಳೇ ಇವು? ಅಣ್ಣಾ ಹಜಾರೆ ಮತ್ತು ಅವರ ಹಿಂದಿರುವ ನಾಗರಿಕ ಸಮಾಜದ ಉದ್ದೇಶವನ್ನು ಪ್ರಶ್ನಿಸುತ್ತಿರುವ ಇವರುಗಳ ಮಾತಿನ ಹಿಂದಿರುವ ಉದ್ದೇಶವಾದರೂ ಯಾವುದು? ಅಮೆರಿಕದ ಪೋರ್ಡ್ ಫೌಂಡೇಶನ್ ಯಾವ ರೀತಿಯ ಸಹಾಯ, ಬೆಂಬಲ ಕೊಡುತ್ತಿದೆ ಎಂಬುದಕ್ಕೆ ಮರುಳಸಿದ್ದಪ್ಪನವರ ಬಳಿ ಯಾವುದಾದರೂ ಆಧಾರಗಳಿವೆಯೇ? ಅರವತ್ತು, ಎಪ್ಪತ್ತು, ಎಂಭತ್ತರ ದಶಕದ ಮಾಮೂಲಿ ಕಮ್ಯುನಿಸ್ಟ್ ಕ್ಲೀಷೆಗಳನ್ನೇ, ಪೊಳ್ಳು ಆರೋಪಗಳನ್ನೇ ಈಗಲೂ ಮಾಡುತ್ತಿರುವ ಇವರು ಹೇಗೆ, ಯಾವ ದೃಷ್ಟಿಯಲ್ಲಿ ಪ್ರಗತಿಪರರು? ಅಣ್ಣಾ ಹಾಗೂ ಅವರ ತಂಡದವರ ಉದ್ದೇಶ ಶುದ್ಧಿಯಿಲ್ಲ ಎಂದೇ ಒಂದು ಕ್ಷಣ ಭಾವಿಸೋಣ. ಅವರ ಉಪವಾಸ, ಹೋರಾಟದಿಂದ ನಾಳೆ ಜನಲೋಕಪಾಲ ಮಸೂದೆ ಜಾರಿಯಾದರೆ ಯಾರಿಗೆ ಲಾಭವಾಗುತ್ತದೆ? ಜೀವನದ ಸಂಧ್ಯಾಕಾಲದಲ್ಲಿರುವ ಅಣ್ಣಾ, ಶಾಂತಿಭೂಷಣ್ ಹಾಗೂ 60ರ ಆಸುಪಾಸಿನಲ್ಲಿರುವ ಇತರ ಸದಸ್ಯರಿಗೆ ಮಾತ್ರವೇ? ಭಾರತದಲ್ಲಿನ ಭ್ರಷ್ಟಾಚಾರಕ್ಕೆ ಕಡಿವಾಣ ಬಿದ್ದರೆ ಫೋರ್ಡ್ ಫೌಂಡೇಶನ್್ಗೆ ಯಾವ ಲಾಭವಾಗುತ್ತದೆ? ಇಂತಹ ವ್ಯವಸ್ಥೆ ಬಂದರೆ ಲಾಭವಾಗುವುದಾದರೂ ಯಾರಿಗೆ? ಲೋಕಪಾಲವೆಂಬುದು ಒಂದು ವರ್ಗ, ದರ್ಜೆಗೆ ಮಾತ್ರ ಅನ್ವಯವಾಗುವ, ಲಾಗೂ ಆಗುವ, ಲಾಭವಾಗುವ ಕಾಯಿದೆಯೇ? ನಾಳೆ ಬೆಳಗ್ಗೆ ನಿಮಗೊಂದು ದಾಖಲೆ, ಪ್ರಮಾಣ ಪತ್ರ ಸರಳ ಹಾಗೂ ತ್ವರಿತವಾಗಿ ಲಭ್ಯವಾಗುವಂತಾದರೆ ಅಣ್ಣಾಗೆ ಗಿಟ್ಟುವುದೇನು?

ಏಕಿಂಥಾ ಅಸಂಬದ್ಧ ಮಾತುಗಳನ್ನಾಡುತ್ತಾರೆ? ಅಪ್ರಬುದ್ಧ ವಾದ ಮಂಡಿಸುತ್ತಾರೆ?

ಜನಸಾಮಾನ್ಯರ ಹಿತಾಸಕ್ತಿಯನ್ನು ಇಟ್ಟುಕೊಂಡಿರುವ ಅಣ್ಣಾನ ಹೋರಾಟ ತಾರ್ಕಿಕ ಅಂತ್ಯದತ್ತ ಆಗಮಿಸಿದೆ. ಇಡೀ ದೇಶವಾಸಿಗಳಿಗೆ ಅನುಕೂಲವಾಗುವ ದಿನಗಳು ಹತ್ತಿರ ಬರುತ್ತಿವೆ. ಸರ್ಕಾರ ಮಣಿದು ಮಂಡಿಯೂರಿದೆ. ಜನ ಅಣ್ಣಾರ ಬೆನ್ನಿಗೆ ನಿಂತಿದ್ದಾರೆ. ಬದಲಾವಣೆ ಸನ್ನಿಹಿತವಾಗಿದೆ. ಆದರೆ ಈ ಪ್ರಗತಿಪರ ಮಹಾನುಭಾವರ ದಲಿತ, ಬಂಡಾಯ, ಪ್ರಗತಿಪರ ಚಳವಳಿಗಳು ಎಲ್ಲಿಗೆ ಬಂದವು ಅಥವಾ ಹೋದವು? ಯಾವ ತಾರ್ಕಿಕ ಅಂತ್ಯವನ್ನು ಕಂಡಿವೆ? ಹಿಂದೊಮ್ಮೆ ಸರ್ವೋದಯವೆಂಬ ಪಕ್ಷ ಕಟ್ಟಿಕೊಂಡಿದ್ದ ಇವರೆಲ್ಲ ಏನು ಮಾಡಿದರು? ಯಾವ ಬದಲಾವಣೆ ತಂದಿದ್ದಾರೆ? ಅವುಗಳಿಂದ ಯಾರ ಉದಯವಾಯಿತು? ಶೇ.3ರಷ್ಟು ಮಂದಿ ರೂಪಿಸಿದ ಕಾಯಿದೆಯನ್ನು ಶೇ.97ರಷ್ಟು ಮಂದಿ ಮೇಲೆ ಹೇರಲಾಗುತ್ತಿದೆ ಎನ್ನುವ ರವಿವರ್ಮ ಕುಮಾರ್ ಅವರ ಗಣಿತ ಜ್ಞಾನದ ಬಗ್ಗೆ ಏನಂತ ಹೇಳುವುದು? ಜಿ. ವೆಂಕಟಸುಬ್ಬಯ್ಯನವರಂತಹ ದೊಡ್ಡ ವ್ಯಕ್ತಿಗಿಂತ ಮೊದಲೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷಗಿರಿ ಗಿಟ್ಟಿಸಿಕೊಂಡ ಕಮಲಾ ಹಂಪನಾ ಅವರ ದಲಿತ ಪ್ರಜ್ಞೆ, ಮೂಡಬಿದ್ರೆಗೆ ಹೋದಾಗ ಜಾಗೃತಗೊಳ್ಳುವ ‘ಜೈನಪ್ರಜ್ಞೆ’ ನಮಗೆ ಗೊತ್ತಿಲ್ಲವೇನು? ಭ್ರಷ್ಟಾಚಾರವೆಂಬುದು ಯಾವುದೋ ಒಂದು ಜಾತಿ, ಧರ್ಮ, ಮತವನ್ನು ಮಾತ್ರ ಕಾಡುತ್ತಿರುವ ಪಿಡುಗೇನು? ರಾಜಧಾನಿ ದಿಲ್ಲಿಯ ಜಾಮಾ ಮಸೀದಿಯ ಶಾಹಿ ಇಮಾಮ್್ಗೂ ಇವರಿಗೂ ಏನು ವ್ಯತ್ಯಾಸ? ಅದಿರಲಿ, ಕುಮಾರಸ್ವಾಮಿಯವರು ಉಪವಾಸ ಕುಳಿತಿದ್ದಾಗ, 24 ಗಂಟೆಯೊಳಗೆ ಉಸ್ಸಪ್ಪಾ ಎಂದಾಗ ನೀರು ಕುಡಿಸಲು ಹೋಗಿದ್ದವರು ಅಣ್ಣಾ 10 ದಿನಗಳಿಂದ ಉಪವಾಸವಿದ್ದರೂ ಕಾಣುತ್ತಿಲ್ಲವಲ್ಲಾ ಏಕೆ? ಕನಿಷ್ಠ ಅಣ್ಣಾ ಪರ ಒಂದು ಹೇಳಿಕೆಯನ್ನಾದರೂ ಕೊಡಬಹುದಿತ್ತಲ್ಲವೆ? ಭ್ರಷ್ಟಾಚಾರವೂ ಒಂದು ಪಿಡುಗು, ದೇಶದ್ರೋಹದ ಕೆಲಸವಲ್ಲವೆ? ಅದರ ವಿರುದ್ಧ ಟೊಂಕಕಟ್ಟಿ ನಿಂತಿರುವ ಅಣ್ಣಾರಿಗೆ ಒಂದು ಸಣ್ಣ ಬೆಂಬಲ ಸೂಚಿಸಿದ್ದರೆ ಏನನ್ನು ಕಳೆದುಕೊಳ್ಳುತ್ತಿದ್ದರು? ಮಾಜಿ ಮುಖ್ಯಮಂತ್ರಿ ಯಡಿಯೂರಪ್ಪನವರ ಭ್ರಷ್ಟಾಚಾರವನ್ನು ಮೌನವಾಗಿ ಸಹಿಸಿಕೊಳ್ಳುವ ಸಂಘಗಳಿಗೂ ಅಣ್ಣಾರನ್ನೇ ಸಂಶಯಿಸುವ ಇವರಿಗೂ ಯಾವ ವ್ಯತ್ಯಾಸವಿದೆ? ಅಲ್ಲಾ, ಒಂದು ಸಣ್ಣ ಕೋಮು ಸಂಘರ್ಷವಾದರೂ ದಿಢೀರನೆ ಪ್ರತಿಕಾಗೋಷ್ಠಿ ಕರೆದು ಬಲಪಂಥೀಯರನ್ನು ತೆಗಳುವ, ಭಗವದ್ಗೀತೆ ಬಗ್ಗೆ ಪ್ರತಿಕಾಗೋಷ್ಠಿ ಹಾಗೂ ಪ್ರತಿಭಟನೆ ಮಾಡಿದ್ದ, ಶಂಕರ್ ಬಿದರಿಯವರು ರಾತ್ರಿ ಹನ್ನೊಂದೂವರೆಗೆ ಪಬ್್ಗಳನ್ನು ಮುಚ್ಚಿಸಿದಾಗ ಬೀದಿಗಿಳಿದಿದ್ದ ಜ್ಞಾನಪೀಠ ನಂಬರ್-7 ಏಕೆ ಏನೂ ಮಾತನಾಡುತ್ತಿಲ್ಲವಲ್ಲಾ? ಅಷ್ಟು ದೊಡ್ಡ ಕಂಠವನ್ನಿಟ್ಟುಕೊಂಡು ಅಣ್ಣಾ ಪರವಾಗಿ ಸಣ್ಣ ಧ್ವನಿಯನ್ನೂ ಎತ್ತಲಾರದಂಥ ಸಂಕಟವೇನಿದೆ ಇವರಿಗೆ?

ಇನ್ನು ಪ್ರಜಾಪ್ರಭುತ್ವದ ಅಂಗಗಳು ಇಕ್ಕಟ್ಟಿಗೆ ಸಿಲುಕುತ್ತವೆ, ಸಂಸತ್ತೇ ಸುಪ್ರೀಂ ಎನ್ನುವುದಾದರೆ ಕಳೆದ 42 ವರ್ಷಗಳಿಂದ ಸಂಸತ್ತು ಹಾಗೂ ಆಳುವವರು ಏನು ಮಾಡುತ್ತಿದ್ದರು? ಒಂದು ವೇಳೆ ಕಳೆದ ಏಪ್ರಿಲ್್ನಲ್ಲಿ ಅಣ್ಣಾ ನಿರಶನಕ್ಕೆ ಕೂರದಿದ್ದರೆ ಇವತ್ತು ಲೋಕಪಾಲ ಮಸೂದೆ ಸಂಸತ್ತಿನ ಮುಂದಿರುತ್ತಿತ್ತೇ? ನಮ್ಮೆಲ್ಲರ ಒಳಿತಿಗಾಗಿ ಅನ್ನ ಬಿಟ್ಟು ಉಪವಾಸ ಕುಳಿರುವ ವ್ಯಕ್ತಿಯ ಉದ್ದೇಶವನ್ನೇ ಶಂಕಿಸುತ್ತಾರಲ್ಲಾ ಇವರನ್ನು ಏನೆಂದು ಕರೆಯಬೇಕು? ವಿಚಾರಗೋಷ್ಠಿಗಳಾಚೆಗೆ ಇವರ ಬುದ್ಧಿ ಬೆಳೆಯುವುದು ಯಾವಾಗ? ಅಣ್ಣಾರನ್ನು ಅಮೆರಿಕದ ಏಜೆಂಟ್ ಎಂದು ಕರೆದ ಕಾಂಗ್ರೆಸ್್ನ ರಶೀದ್ ಆಲ್ವಿಗೂ ಇವರ ಮಾತುಗಳಿಗೂ ಯಾವ ವ್ಯತ್ಯಾಸವಿದೆ?

ಕೃಪೆ: ಪ್ರತಾಪ ಸಿಂಹ

ಮಂಗಳವಾರ, ಆಗಸ್ಟ್ 16, 2011

ಸತ್ಯವನ್ನು ಬಟ್ ಆಫ್ ಎ ಜೋಕ್ ಮಾಡುತ್ತಿದ್ದಾರೆ ಈ ಸಂಜೀವ್ ಭಟ್!

ಸಂಜೀವ್ ಭಟ್, ಐಪಿಎಸ್, ಗುಜರಾತ್!

ಒಬ್ಬ ಐಪಿಎಸ್ ಅಧಿಕಾರಿಯಾಗಿರಲು ನಾಲಾಯಕ್ಕು ಎಂದು ಗುಜರಾತ್ ಸರ್ಕಾರ ಈತನನ್ನು ಮೊನ್ನೆ ಮಂಗಳವಾರ ಅಮಾನತು ಮಾಡಿದೆ. ಅಖಿಲ ಭಾರತ ಸೇವಾ ನಿಯಮದ 3(1) ಕಲಂ ಅನ್ನು ಮುಂದಿಟ್ಟುಕೊಂಡು ಅಂತಹ ನಿರ್ಧಾರ ಕೈಗೊಳ್ಳಲಾಗಿದೆ. ಅದರ ಬೆನ್ನಲ್ಲೇ ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ಮೋದಿಯವರ ದೂಷಣೆ ಆರಂಭವಾಗಿದೆ. ಹೀಗೆ ಸಂಜೀವ್ ಭಟ್ ಮತ್ತೆ ಸುದ್ದಿಯಾಗುತ್ತಿದ್ದಾರೆ. ಅವರನ್ನು ಹುತಾತ್ಮರನ್ನಾಗಿ ಮಾಡುವ ಕೆಲಸ ಬಹಳ ಭರದಿಂದ ಸಾಗಿದೆ. ಅಂದಹಾಗೆ ಸಂಜೀವ್ ಭಟ್ ಯಾರೆಂದು ಗೊತ್ತಾಯಿತಲ್ಲವೆ? ನಮ್ಮ ಸೆಕ್ಯುಲರ್ ಬ್ರಿಗೇಡ್್ನ ಈ ಹೊಸ ಹೀರೋನ ನಿಜರೂಪವನ್ನು ತಿಳಿದುಕೊಳ್ಳುವ ಮೊದಲು ಈತ ಎಂತಹ ಘನ ಕಾರ್ಯ ಮಾಡಿದ್ದ, ಎಂತಹ ಸತ್ಯಸಂಧ ಎಂಬುದನ್ನು ಸ್ವಲ್ಪ ಕೇಳುತ್ತೀರಾ?

’2002, ಫೆಬ್ರವರಿ 27ರಂದು ನಡೆದ ಹಿರಿಯ ಪೊಲೀಸ್ ಅಧಿಕಾರಿಗಳ ಸಭೆಯಲ್ಲಿ ಹಿಂದುಗಳು ತಮ್ಮ ಕೋಪವನ್ನು ಹೊರಹಾಕಲು, ಪ್ರತೀಕಾರ ತೆಗೆದುಕೊಳ್ಳಲು ಅಡ್ಡಿಪಡಿಸಬಾರದು ಎಂದು ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ದಾಮೋದರದಾಸ್ ಮೋದಿ ಸೂಚನೆ ನೀಡಿದ್ದರು. ಆ ಸಭೆಯಲ್ಲಿ ನಾನೂ ಪಾಲ್ಗೊಂಡಿದ್ದೆ’ ಎಂಬ ಅಫಿಡವಿಟ್ ಒಂದನ್ನು 2011, ಏಪ್ರಿಲ್ 14ರಂದು ಸುಪ್ರೀಂ ಕೋರ್ಟ್್ಗೆ ಸಲ್ಲಿಸಿಬಿಟ್ಟರು. ಮೊದಲೇ ಮೋದಿಯನ್ನು ಹಣಿಯಲು ಕಾದುಕುಳಿತುಕೊಂಡಿದ್ದ ಮಾಧ್ಯಮಗಳ ಒಂದು ವರ್ಗ ಹಾಗೂ ತೀಸ್ತಾ ಸೆತಲ್ವಾಡ್, ಶಬ್ಮಮ್ ಹಶ್ಮಿಯಂಥವರಿಗೆ ಇದಕ್ಕಿಂತ ಯಾವ ಸಿಹಿ ಸುದ್ದಿ ಸಿಗಲು ಸಾಧ್ಯ?

1. Senior Gujarat IPS officer implicates Narendra Modi in 2002 Godhra riots!

2. Sanjeev Bhatt to make startling revelations against Modi before Nanavati Commission!

ಆತನ ಪ್ರತಿಪಾದನೆಯಲ್ಲಿ ಎಷ್ಟರಮಟ್ಟಿನ ಸತ್ಯ ಅಡಗಿದೆ ಎಂಬುದನ್ನು ಪರಾಮರ್ಶಿಸುವ ಗೋಜಿಗೂ ಹೋಗದೆ, ಇಂತಹ ರೋಚಕ ಶೀರ್ಷಿಕೆಗಳನ್ನು ಕೊಟ್ಟು ಸಂಭ್ರಮಾಚರಣೆಯನ್ನೂ ಮಾಡಿದರು.

ಆದರೆ…

1988ರ ಬ್ಯಾಚಿನ ಐಪಿಎಸ್ ಅಧಿಕಾರಿಯಾದ, ಕೇವಲ 12 ವರ್ಷ ಅನುಭವ ಹೊಂದಿದ್ದ ಈ ಕಿರಿಯ ವ್ಯಕ್ತಿ ಹಿರಿಯ ಅಧಿಕಾರಿಗಳ ಉನ್ನತಮಟ್ಟದ ಸಭೆಯಲ್ಲಿ ಪಾಲ್ಗೊಂಡಿದ್ದಾದರೂ ಹೇಗೆ? ಆತನ ಪ್ರತಿಪಾದನೆ ನಿಜಕ್ಕೂ ವಾಸ್ತವಕ್ಕೆ ಹತ್ತಿರವಾಗಿತ್ತೆ? ಅಥವಾ ವಾಸ್ತವದಲ್ಲಿ ಆತ ಆ ಸಭೆಯಲ್ಲಿ ಪಾಲ್ಗೊಂಡಿದ್ದರೆ? ಆ ಸಭೆಯಲ್ಲಿ ನಿಜಕ್ಕೂ ಪಾಲ್ಗೊಂಡಿದ್ದವರಾರು? ಈ ವಿಷಯದಲ್ಲಿ ಮಾಧ್ಯಮಗಳಿಗೆ ಈಗಾಗಲೇ ಸೋರಿಕೆಯಾಗಿರುವ ಸುಪ್ರೀಂಕೋರ್ಟ್ ನೇಮಕ ಮಾಡಿರುವ ಮಾಜಿ ಸಿಬಿಐ ನಿರ್ದೇಶಕ ಆರ್.ಕೆ. ರಾಘವನ್ ನೇತೃತ್ವದ ವಿಶೇಷ ತನಿಖಾ ತಂಡದ (SIT) ವರದಿಯೇ ಹೆಚ್ಚಿನ ಬೆಳಕು ಚೆಲ್ಲುತ್ತದೆ. ಹೌದು, 2002, ಫೆಬ್ರವರಿ 27ರಂದು ಅಹ್ಮದಾಬಾದ್್ನಲ್ಲಿನ ಮುಖ್ಯಮಂತ್ರಿಗಳ ನಿವಾಸದಲ್ಲಿ ಸಭೆ ನಡೆದಿದ್ದು ನಿಜ. 2010, ಮಾರ್ಚ್ 25ರಂದು SITಮುಂದೆ ಹಾಜರಾಗಿದ್ದ ನರೇಂದ್ರ ಮೋದಿ ಇಂಥದ್ದೊಂದು ಸಭೆ ಕರೆದಿದ್ದನ್ನು, ಅದು ನಡೆದಿದ್ದನ್ನು ಒಪ್ಪಿಕೊಂಡಿದ್ದಾರೆ. ಆ ಸಭೆ ಅರ್ಧ ಗಂಟೆ ನಡೆಯಿತು. ಅದರಲ್ಲಿ 8 ಜನ ಪಾಲ್ಗೊಂಡಿದ್ದರು.

1. ಮುಖ್ಯಮಂತ್ರಿ

2. ಮುಖ್ಯ ಕಾರ್ಯದರ್ಶಿ

3. ಹೆಚ್ಚುವರಿ ಕಾರ್ಯದರ್ಶಿ

4. ಪೊಲೀಸ್ ಮಹಾನಿರ್ದೇಶಕ

5. ಅಹಮದಾಬಾದ್ ಪೊಲೀಸ್ ಕಮಿಷನರ್

6. ಗೃಹ ಕಾರ್ಯದರ್ಶಿ

7. ಮುಖ್ಯಮಂತ್ರಿಯವರ ಪ್ರಧಾನ ಕಾರ್ಯದರ್ಶಿ ಹಾಗೂ

8. ಕಾರ್ಯದರ್ಶಿ

ಈ ಮೇಲಿನ ಯಾವ ಹುದ್ದೆಗಳನ್ನೂ ಹೊಂದಿರದ ಹಾಗೂ ಆ ಸಮಯದಲ್ಲಿ ಗುಪ್ತಚರ ದಳದ ಸಾಮಾನ್ಯ ಡಿಸಿಪಿಯಾಗಿದ್ದ ಸಂಜೀವ್ ಭಟ್ ಹೇಗೆತಾನೇ ಆ ಉನ್ನತ ಮಟ್ಟದ ಸಭೆಯಲ್ಲಿ ಪಾಲ್ಗೊಂಡಿರಲು ಸಾಧ್ಯ? ಈ ಮಧ್ಯೆ, ಅಂದು ಗುಪ್ತಚರ ದಳದ ಮುಖ್ಯಸ್ಥರು ರಜೆಯಲ್ಲಿದ್ದರು, ಹಾಗಾಗಿ ನಿಮ್ಮ ಇಲಾಖೆಯಿಂದ ಯಾರಾದರೂ ಒಬ್ಬರು ಬರಬೇಕೆಂದು ಡಿಜಿಪಿ ಸೂಚನೆ ನೀಡಿದ ಕಾರಣ ನಾನು ಹೋಗಿದ್ದೆ ಎಂದು ಸಂಜೀವ್ ಭಟ್ ಪ್ರತಿಪಾದಿಸಿದರು. ನಾನು ಹಾಗೆಂದು ಹೇಳಿಯೇ ಇರಲಿಲ್ಲ, ಸಂಜೀವ್ ಭಟ್ ಸಭೆಯಲ್ಲಿ ಇರಲೂ ಇಲ್ಲ ಎಂದು ಆಗಿನ ಡಿಜಿಪಿ ಕೆ. ಚಕ್ರವರ್ತಿಯವರೇ ಅಲ್ಲಗಳೆದರು.

ಇದನ್ನೆಲ್ಲ ಪರಿಗಣಿಸಿದ SIT, ‘ಕಾನೂನು ಮತ್ತು ಸುವ್ಯವಸ್ಥೆ ನೆಲೆಗೊಳಿಸುವ ನಿಟ್ಟಿನಲ್ಲಿ ನರೇಂದ್ರ ಮೋದಿ ಸಭೆ ಕರೆದಿದ್ದಿದ್ದು ನಿಜ. ಆದರೆ ಪ್ರತೀಕಾರ ತೆಗೆದುಕೊಳ್ಳಲು ಹಿಂದುಗಳಿಗೆ ಅವಕಾಶವೀಯಬೇಕು ಎಂದು ಮುಖ್ಯಮಂತ್ರಿಯವರು ಮುಖ್ಯ ಕಾರ್ಯದರ್ಶಿ ಹಾಗೂ ಡಿಜಿಪಿಗೆ ಸೂಚನೆ ಕೊಟ್ಟಿದ್ದರು ಎಂಬುದಕ್ಕೆ ಯಾವುದೇ ಆಧಾರಗಳಿಲ್ಲ. ಸಂಜೀವ್ ಭಟ್ ಸಭೆಯಲ್ಲಿ ಹಾಜರಿದ್ದರು ಎಂಬುದನ್ನು ಎಂಟು ಜನರಲ್ಲಿ ಯಾವೊಬ್ಬರು ಖಾತ್ರಿಪಡಿಸಿಲ್ಲ’ ಎಂದು ಷರಾ ಬರೆಯಿತು. ಮತ್ತೂ ಮುಂದುವರಿದು, ‘ಸಂಜೀವ್ ಭಟ್ ಅವರೊಬ್ಬ ವಿಶ್ವಾಸಾರ್ಹ ಸಾಕ್ಷಿಯಲ್ಲ. ಅಂದು ಪಾಲ್ಗೊಂಡಿದ್ದ ಎಲ್ಲ ಅಧಿಕಾರಿಗಳೂ ಆತನ ಉಪಸ್ಥಿತಿಯನ್ನು ನಿರಾಕರಿಸಿದ್ದಾರೆ’ ಎಂದಿತು. ಈತ ಎಂತಹ ವಂಚಕನೆಂದರೆ ಈತನ ಕಪೋಲ ಕಲ್ಪಿತ ಕಥೆಯ ಸಂಬಂಧ ಸತತ ಪ್ರಶ್ನೆಗೆ ಗುರಿಪಡಿಸಿದ ಖಐಖಿ ವಿರುದ್ಧವೂ ಸುಪ್ರೀಂಕೋರ್ಟ್್ಗೆ ಸಲ್ಲಿಸಿದ ಅಫಿಡವಿಟ್್ನಲ್ಲಿ ಹರಿಹಾಯ್ದರು, ಅದರ ಮೇಲೆ ತನಗೆ ವಿಶ್ವಾಸವಿಲ್ಲ ಎಂದರು. ನಾನು ಆ ಸಭೆಯಲ್ಲಿ ಪಾಲ್ಗೊಂಡಿದ್ದೆ ಎಂಬ ಬಗ್ಗೆ ಸಂಶಯವಿದ್ದರೆ ನನ್ನ ಕಾರುಚಾಲಕನನ್ನು ಕೇಳಿ ಎಂದು ಕಾಗಕ್ಕ, ಗುಬ್ಬಕ್ಕನ ಕಥೆ ಹೇಳಿದರು.

ಹೀಗೆ ಆತನ ಸುಳ್ಳುಗಳು ನಗ್ನಗೊಳ್ಳುವ ಕಾಲ ಹತ್ತಿರಕ್ಕೆ ಬರುತ್ತಿದ್ದಂತೆಯೇ ಮಾಧ್ಯಮ ಸ್ನೇಹಿತರು ಕಾರ್ಯಪ್ರವೃತ್ತರಾದರು!

ಪದ್ಮಶ್ರೀ ರಾಜ್್ದೀಪ್ ಸರ್್ದೇಸಾಯಿ ಅವರು ಗುಜರಾತ್್ನಲ್ಲಿ ತಮ್ಮ ಸಿಎನ್್ಎನ್-ಐಬಿಎನ್ ಚಾನೆಲ್್ನ ಇಬ್ಬರು ಪ್ರತಿನಿಧಿಗಳನ್ನಿಟ್ಟಿದ್ದಾರೆ-ಆಶೋಕ್ ಬಾಗ್ರಿಯಾ ಮತ್ತು ಮೇಘದೂತ್ ಶರೋನ್. ಇಡೀ ವಿಶ್ವವೇ ಬೆಚ್ಚಿ ಬೆರಗಾಗುತ್ತಿರುವ ನರೇಂದ್ರ ಮೋದಿಯವರ ಅಭಿವೃದ್ಧಿ ಕಾರ್ಯಗಳ ಬಗ್ಗೆಯಾಗಲಿ, ಉತ್ತಮ ಆಡಳಿತ ನಿರ್ವಹಣೆಗಾಗಿ ವಿಶ್ವಸಂಸ್ಥೆ ಮೋದಿಗೆ ನೀಡಿದ ಸರ್ಟಿಫಿಕೆಟ್ ಬಗ್ಗೆಯಾಗಲಿ ಇವರಿಬ್ಬರು ವರದಿ ಮಾಡಿದ್ದನ್ನು, ನರೇಂದ್ರ ಮೋದಿಯವರನ್ನು ಹಳಿಯುವುದು ಬಿಟ್ಟು ಸಕಾರಾತ್ಮಕ ಚಿತ್ರಣವನ್ನು ಮುಂದಿಟ್ಟಿದ್ದನ್ನು ನೀವು ಎಂದಾದರೂ ನೋಡಿದ್ದೀರಾ? ಸಂಜೀವ್ ಭಟ್ ಪ್ರತಿಪಾದನೆಗೆ ಯಾವ ಸಾಕ್ಷ್ಯಗಳೂ ಇಲ್ಲ, ಅವರ ಮಾತುಗಳು ನಂಬಲರ್ಹವಲ್ಲ ಎಂಬ ವರದಿಯನ್ನು SIT, ಸುಪ್ರೀಂಕೋರ್ಟ್್ಗೆ ಸಲ್ಲಿಸಿದಾಗ ಹಳಿಯಲು ಇಳಿದ ಬಾಗ್ರಿಯಾ ಮತ್ತು ಶರೋನ್, ‘SIT disregards Bhatt’s statement against Modi ಎಂದು ವರದಿ ಮಾಡಿದರು! ಇದರ ಅರ್ಥವೇನು? ಇವರು ಯಾವ ಉದ್ದೇಶ, ಗುರಿಗಳನ್ನು ಇಟ್ಟುಕೊಂಡು ಕಾರ್ಯನಿರ್ವಹಿಸುತ್ತಿದ್ದಾರೆ ಎಂಬುದು ಇದರಿಂದ ಅರ್ಥವಾಗುವುದಿಲ್ಲವೆ?

ಅಂದಮಾತ್ರಕ್ಕೆ ಚಾನೆಲ್್ಗಳ ಚಾಲಾಕಿತನ, ಸಂಜೀವ್ ಭಟ್್ರಂಥ ಝಈ್ಝಟ್ಞಿ ್ಝಟಿ ಝಿಜ ಆ್ಠಟ್ಟ್ಠ’ ಬಗ್ಗೆ ನರೇಂದ್ರ ಮೋದಿಯವರಿಗೆ ಅರಿವಿರಲಿಲ್ಲ ಎಂದುಕೊಂಡಿರಾ?

ಮೊನ್ನೆ ಜುಲೈ 27ರಂದು ನಿಜವಾದ “Startling revelations‘ ಹೊರಬಿದ್ದಿದೆ. ಕಳೆದ 5 ವರ್ಷಗಳಿಂದಲೂ ನರೇಂದ್ರ ಮೋದಿಯವರು ಆತನ ಈ-ಮೇಲ್, ಫೋನ್ ಕಾಲ್್ಗಳ ಮೇಲೆ ನಿಗಾ ಇಡಿಸಿದ್ದರು! ಈ ಸಂಜೀವ್ ಭಟ್ ಗುಜರಾತ್ ಹಿಂಸಾಚಾರದ ವೇಳೆ ಹಿಂದು ಕೋಮುವಾದಿಗಳು ಕೌಸರ್್ಬಿ ಎಂಬ ಗರ್ಭಿಣಿಯ ಹೊಟ್ಟೆ ಬಗೆದು, ಭ್ರೂಣವನ್ನು ತ್ರಿಶೂಲದ ತುದಿಯಿಂದ ಮೇಲೆತ್ತಿ ಗಹಗಹಿಸಿ ನಕ್ಕಿದ್ದರು ಎಂಬ ಕಥೆ ಸೃಷ್ಟಿಸಿ ಸಿಕ್ಕಿಹಾಕಿಕೊಂಡಿರುವ ತೀಸ್ತಾ ಸೆತಲ್ವಾಡ್, ಗುಜರಾತ್ ಕಾಂಗ್ರೆಸ್ ಅಧ್ಯಕ್ಷ ಅರ್ಜುನ್ ಮೋದ್ವಾದಿಯಾ, ಪ್ರತಿಪಕ್ಷ ನಾಯಕ ಶಕ್ತಿ ಸಿಂಗ್ ಗೋಹಿತ್ ಜತೆ ಸತತ ಸಂಪರ್ಕದಲ್ಲಿ ಇದ್ದರು ಎಂಬುದು ಬೆಳಕಿಗೆ ಬಂದಿದೆ. ಆತ ಈ ಎಲ್ಲ ವ್ಯಕ್ತಿಗಳ ಜತೆ ಯಾವ ಇ-ಮೇಲ್್ಗಳ ಮೂಲಕ ಸಂಪರ್ಕವಿಟ್ಟುಕೊಂಡಿದ್ದಾರೋ ಆ ಇ-ಮೇಲ್್ಗಳು ಖಐಖಿ ಗೆ ದೊರೆತಿವೆ! ನರೇಂದ್ರ ಮೋದಿಯವರ ದೂಷಣೆಯನ್ನೇ ಕಾಯಕ ಮಾಡಿಕೊಂಡಿರುವ ‘ದಿ ಹಿಂದು’ ಪತ್ರಿಕೆಯ ಸಂಪಾದಕರಾಗಿದ್ದ ಎನ್.ರಾಮ್ ಜೊತೆಯೂ ಸಂಜೀವ್ ಭಟ್ ಇ-ಮೇಲ್ ಸಂಪರ್ಕ ಇಟ್ಟುಕೊಂಡಿದ್ದನ್ನು ರಾಮ್ ದಾಯಾದಿ ಎನ್. ಮುರಳಿಯವರೇ ಹೊರಹಾಕಿದ್ದಾರೆ. ಇತ್ತೀಚೆಗೆ ಹಿಂದು ಪತ್ರಿಕೆಯ ಉದ್ಯೋಗಿಗಳಿಗೆ ಬರೆದಿರುವ ವಿದಾಯ ಪತ್ರದಲ್ಲಿ ಸಂಜೀವ್ ಭಟ್ ಇ-ಮೇಲ್್ನಲ್ಲಿದ್ದ ಸಂದೇಶ/ಸೂಚನೆಯನ್ನು ಎನ್. ಮುರಳಿ ಹೀಗೆ ಉಲ್ಲೇಖಿಸುತ್ತಾರೆ- Here is the note, I would like you to go through it that you understand the issues before you talk to the person concerned, goes the email. We all know who the person concerned that Ram was supposed to talk to is”that Ram was supposed to talk to is”.
person concerned
ಯಾರು? ಸೋನಿಯಾ ಗಾಂಧಿಯವರೋ ಅಥವಾ ಅವರ ಆಪ್ತ ಅಹಮದ್ ಪಟೇಲರೋ?!

ಒಟ್ಟಿನಲ್ಲಿ ಕಾಂಗ್ರೆಸ್ ನಾಯಕರ ಸೂಚನೆಯಂತೆ ಸಂಜೀವ್ ಭಟ್ ವರ್ತಿಸುತ್ತಿದ್ದುದು ಬಹಿರಂಗವಾಗಿದೆ. ಅಷ್ಟೇ ಅಲ್ಲ, 2002, ಫೆಬ್ರವರಿ 27ರಂದು ನಡೆದ ಸಭೆಯಲ್ಲಿ ತಾನು ಪಾಲ್ಗೊಂಡಿದ್ದೆ ಎಂದು ಸಾಬೀತುಪಡಿಸುವುದಕ್ಕೆ ಬೇಕಾದ ಸಾಕ್ಷ್ಯ ಸೃಷ್ಟಿಸಲು ಸಹಾಯ ಮಾಡು ಎಂದು ಮತ್ತೊಬ್ಬ ಮೋದಿ ವಿರೋಧಿ ಐಪಿಎಸ್ ಅಧಿಕಾರಿ ರಾಹುಲ್ ಶರ್ಮನಿಗೆ ಮಾಡಿದ ಇ-ಮೇಲ್್ಗಳೂ ಸಿಕ್ಕಿವೆ. ತನಗೆ ವೈ ಕೆಟಗರಿ ಭದ್ರತೆ ಒದಗಿಸುವಂತೆ ಲಾಬಿ ಮಾಡಿ ಎಂದು ಮೋದಿ ದೂಷಣೆಯಲ್ಲಿ ಪರಿಣತರಾದ ಶಬ್ಮಮ್ ಹಶ್ಮಿ ಹಾಗೂ ಸೆಡ್ರಿಕ್ ಪ್ರಕಾಶ್್ಗೆ ಮನವಿ ಮಾಡಿಕೊಂಡಿರುವ, 2011 ಮೇ 9ರಂದು ಮಾಡಿದ ಇ-ಮೇಲ್್ನಲ್ಲಿ ನನ್ನ ಪರ ಸಹಿಸಂಗ್ರಹಣೆ ಮಾಡಿ ಎಂದು ಒತ್ತಾಯಿಸಿರುವ ಅಂಶಗಳು ಗೊತ್ತಾಗಿವೆ. ಅಷ್ಟೇ ಅಲ್ಲ, ಏಪ್ರಿಲ್ 14ರಂದು ಸುಪ್ರೀಂಕೋರ್ಟ್ ಮುಂದೆ ಸಲ್ಲಿಸಿದ ಅಫಿಡವಿಟ್್ಗೂ ಪೂರ್ವದಲ್ಲಿ ತೀಸ್ತಾ ಸೆತಲ್ವಾಡ್, ಅರ್ಜುನ್ ಮೋದ್ವಾದಿಯಾ ಹಾಗೂ ಶಕ್ತಿ ಸಿಂಗ್ ಗೋಹಿತ್ ಜೊತೆ ಸತತ ಸಂಪರ್ಕದಲ್ಲಿದ್ದಲ್ಲದೆ, ಗೋಹಿತ್್ರಿಂದ ಬ್ಲ್ಯಾಕ್್ಬೆರಿ ಮೊಬೈಲ್ ಪಡೆದುಕೊಂಡಿರುವುದಕ್ಕೂ ಸಾಕ್ಷ್ಯಗಳು ಸಿಕ್ಕಿವೆ. ಹೀಗೆ ಬಣ್ಣ ಬಯಲಾಗಿದ್ದೇ ತಡ, ಜುಲೈ 28ರಂದು ದಿಲ್ಲಿಯಲ್ಲಿರುವ ಆರ್ಥಿಕ ಅಪರಾಧಗಳ ದಳದ (EOW) ಮುಂದೆ ಅಲವತ್ತುಕೊಂಡ ಭಟ್, ತನ್ನ ಇ-ಮೇಲ್್ಗಳನ್ನು ಹ್ಯಾಕ್ ಮಾಡಲಾಗಿದ್ದು, ತನಿಖೆ ನಡೆಸಿ ಎಂದು ಗೋಗರೆದಿದ್ದಾರೆ. ಒಂದು ವೇಳೆ, ಈತ ಸತ್ಯಸಂಧನಾಗಿದ್ದರೆ ಬೊಬ್ಬೆ ಹಾಕುವ ಅಗತ್ಯವೇನಿತ್ತು? ಈ-ಮೇಲ್್ಗಳಲ್ಲಿ ವಿನಿಮಯ ಮಾಡಿಕೊಂಡಿದ್ದು ಸತ್ಯಸಂಗತಿಯಾಗಿದ್ದರೆ ಹೆದರುವ ಅವಶ್ಯಕತೆ ಎಲ್ಲಿಂದ ಬರುತ್ತಿತ್ತು?

ಇಂತಹ ಸುಳ್ಳುಗಾರ ಅದ್ಯಾವ ಕಾರಣಕ್ಕಾಗಿ ಕೆಲ ಮಾಧ್ಯಮಗಳ ಕಣ್ಣಿಗೆ ಹೀರೊನಂತೆ ಕಾಣುತ್ತಾರೆ?

ಪತ್ರಿಕೋದ್ಯಮದಲ್ಲಿ ಎಷ್ಟೋ ಅರ್ಹರಿದ್ದರೂ ಅವರನ್ನೆಲ್ಲ ಬಿಟ್ಟು ಎನ್್ಡಿಟಿವಿಯ ಬರ್ಖಾ ದತ್, ಐಬಿಎನ್್ನ ರಾಜ್್ದೀಪ್ ಸರ್್ದೇಸಾಯಿಯವರಿಗೆ, ಸುಳ್ಳುಗಾತಿ ತೀಸ್ತಾ ಸೆತಲ್ವಾಡ್್ಗೆ ಯಾವ ಕಾರಣಕ್ಕಾಗಿ ಪದ್ಮಶ್ರೀ ಕೊಡಲಾಗಿದೆ ಅಂದುಕೊಂಡಿರಿ? ನರೇಂದ್ರ ಮೋದಿಯವರ ಚಾರಿತ್ರ್ಯವಧೆ ಮಾಡಿದ, ಅವರನ್ನು ಸತತವಾಗಿ ನಕಾರಾತ್ಮಕವಾಗಿ ಚಿತ್ರಿಸಿದ ಸೇವೆಗಾಗಿಯೇ ಇರಬಹುದಲ್ಲವೆ? ಮೋದಿಯವರನ್ನು Mass murderer‘ಎಂದು ಬಹಳ ವೀರಾವೇಶದಿಂದ ಜರಿದಿದ್ದ ‘ಹಿಂದುಸ್ಥಾನ್ ಟೈಮ್ಸ್್’ ಪತ್ರಿಕೆಯ ಮಾಜಿ ಸಂಪಾದಕ ವೀರ್ ಸಾಂಘ್ವಿಗೂ ಅದೇ ಸೇವೆಗಾಗಿ ಪುರಸ್ಕಾರ ದೊರೆತಿತ್ತು. ಸರ್ಕಾರೇತರ ಸಂಘಟನೆ ಕಟ್ಟಿಕೊಂಡು ಮೋದಿ ದೂಷಣೆಯನ್ನೇ ವೃತ್ತಿಯಾಗಿ ಮಾಡಿಕೊಂಡಿರುವ ಶಬ್ಮಮ್ ಹಸ್ಮಿ, ಜಾನ್ ದಯಾಳ್, ಸೆಡ್ರಿಕ್ ಪ್ರಕಾಶ್, ಶ್ರೀನಿವಾಸನ್ ಜೈನ್ ಈಗಾಗಲೇ ಪದ್ಮಶ್ರೀಗಾಗಿ ಕ್ಯೂನಲ್ಲಿ ನಿಂತಿದ್ದಾರೆ. ರಾಹುಲ್ ಶರ್ಮಾ, ಸಂಜೀವ್ ಭಟ್ ಈ ಸಾಲಿಗೆ ಹೊಸ ಸೇರ್ಪಡೆ ಅಷ್ಟೇ. 2012ರಲ್ಲಿ ಗುಜರಾತ್ ವಿಧಾನಸಭೆಗೆ ಚುನಾವಣೆ ಇದೆ, 2014ರಲ್ಲಿ ಸಂಸತ್ ಚುನಾವಣೆ ಘೋಷಣೆಯಾಗಲಿದೆ. ಈ ಸಂದರ್ಭದಲ್ಲಿ ಮೋದಿಯವರ ವಿರುದ್ಧದ ದಾಳಿಗಳು ಇನ್ನೂ ಹೆಚ್ಚಾಗಲಿವೆ, ಕಾದು ನೋಡಿ. ಈ ಮಾಧ್ಯಮಗಳು ಯಾವ ರೀತಿ ಸುಳ್ಳು ಹರಡುತ್ತವೆ, ದುರುದ್ದೇಶ ಪೂರಿತವಾಗಿ ವರ್ತಿಸುತ್ತವೆ ಎಂಬುದಕ್ಕೆ ಪ್ರಸ್ತುತ “ದಿ ನ್ಯೂ ಇಂಡಿಯನ್ ಎಕ್ಸ್್ಪ್ರೆಸ್್” ಪತ್ರಿಕೆಯ ಮುಖಪುಟದಲ್ಲಿ ಎಸ್. ಗುರುಮೂರ್ತಿಯವರು ಸೊಹ್ರಾಬುದ್ದೀನ್ ನಕಲಿ ಎನ್್ಕೌಂಟರ್್ಗೆ ಸಂಬಂಧಿಸಿದಂತೆ ಬರೆಯುತ್ತಿರುವ ಲೇಖನಗಳು ನಿತ್ಯವೂ ಕನ್ನಡಿ ಹಿಡಿಯುತ್ತಿರುವುದನ್ನು ನೀವು ಓದಬಹುದು.

ಕೊನೆಗೂ ಕಾಡುವ ಪ್ರಶ್ನೆ ಏನೆಂದರೆ- ಸತ್ಯ, ಪ್ರಾಮಾಣಿಕತೆಯನ್ನೇ Butt of a joke ಆಗಿಸುತ್ತಿರುವ ಈ ಸಂಜೀವ್ Bhat ಮತ್ತು ಮಾಧ್ಯಮಗಳ ಲಜ್ಜೆಗೇಡಿತನಕ್ಕೆ ಏನನ್ನಬೇಕು?

ಕೃಪೆ: ಪ್ರತಾಪ ಸಿಂಹ

ಸೋಮವಾರ, ಆಗಸ್ಟ್ 8, 2011

ಆರೆಸ್ಸೆಸ್ ಬಾಂಬ್ ತಯಾರಿಸುವ ಕಾರ್ಖಾನೆಯೇ?


ನಾನು ಕ್ರೈಸ್ತ. ಜನ್ಮತಃ ಕ್ರೈಸ್ತ. ನಾನು ಪಾಲಿಸುವುದು, ಅನುಸರಿಸುವುದು, ವಿಶ್ವಾಸಿಸುವುದೂ ಕ್ರೈಸ್ತ ಧರ್ಮವನ್ನೇ. ಪ್ರತಿ ಭಾನುವಾರ ಚರ್ಚ್ ಗೆ ಹೋಗುತ್ತೇನೆ.

ಆದರೆ…

ನಾನು ಆರೆಸ್ಸೆಸ್ ನಿಂದಲೂ ಬಹಳಷ್ಟು ವಿಚಾರಗಳನ್ನು ಕಲಿತಿದ್ದೇನೆ. ನಾನು ಆರೆಸ್ಸೆಸ್ ನ ಅಭಿಮಾನಿಯಾಗಿದ್ದು 1979ರಲ್ಲಿ. ಆಗ ಕೋಯಿಕ್ಕೋಡ್ ನ ಜಿಲ್ಲಾ ನ್ಯಾಯಾಧೀಶನಾಗಿದ್ದೆ. ಸರಳ ಜೀವನ, ಉದಾತ್ತ ಚಿಂತನೆ ಆರೆಸ್ಸೆಸ್ ನ ಹೆಗ್ಗುರುತು. ಮಹಾತ್ಮ ಗಾಂಧೀಜಿ ಹತ್ಯೆಗೆ ಆರೆಸ್ಸೆಸ್ ಕಾರಣ ಎನ್ನುವ ಕೆಟ್ಟ ಪ್ರಚಾರಾಂದೋಲನ ಮೊದಲು ನಿಲ್ಲಬೇಕು. ಯಾವುದೋ ಒಂದು ಕಾಲದಲ್ಲಿ ಆರೆಸ್ಸೆಸ್ ಕಾರ್ಯಕರ್ತನಾಗಿದ್ದ ವ್ಯಕ್ತಿ ಎಸಗಿದ ಕೃತ್ಯಕ್ಕೆ ಸಂಘಟನೆಯನ್ನೇ ದೂರುವುದು ಸರಿಯಲ್ಲ. ಆರೆಸ್ಸೆಸ್ಸನ್ನು ನ್ಯಾಯಾಲಯವೇ ನಿರ್ದೋಷಿಯೆಂದು ತೀರ್ಪಿತ್ತಿದೆ. ಮಿಗಿಲಾಗಿ ಇಡೀ ಸಿಖ್ ಸಮುದಾಯವೇ ಇಂದಿರಾ ಗಾಂಧಿ ಹತ್ಯೆಗೆ ಕಾರಣ ಎನ್ನಲು ಸಾಧ್ಯವೆ? ಆರೆಸ್ಸೆಸ್ ಅಲ್ಪಸಂಖ್ಯಾತ ವಿರೋಧಿ ಎಂಬ ಪ್ರಚಾರಾಂದೋಲನ ಕೂಡ ಆಧಾರರಹಿತ. ನಾನು ಆರೆಸ್ಸೆಸ್್ನ ದೊಡ್ಡ ಅಭಿಮಾನಿ. ತುರ್ತು ಪರಿಸ್ಥಿತಿಯ ವಿರುದ್ಧದ ಹೋರಾಟದಲ್ಲಿ ಭಾಗಿಯಾದ ಏಕಮಾತ್ರ ರಾಜಕೀಯೇತರ ಸಂಘಟನೆ ಆರೆಸ್ಸೆಸ್. ನಮ್ಮ ಮೂಲಭೂತ ಹಕ್ಕುಗಳನ್ನು ಮರಳಿ ಗಳಿಸಿಕೊಡುವುದಕ್ಕಾಗಿ ಹಲವು ಜೀವಗಳನ್ನೇ ಬಲಿಕೊಟ್ಟ ಆರೆಸ್ಸೆಸ್ ಗೆ ನಾವೆಲ್ಲ ಆಭಾರಿಯಾಗಿರಬೇಕು…….”

ಮೊನ್ನೆ ಆಗಸ್ಟ್ 1ರಂದು ಕೊಚ್ಚಿಯಲ್ಲಿ ನಡೆದ ಸಮಾರಂಭವೊಂದನ್ನು ಉದ್ದೇಶಿಸಿ ಸುಪ್ರೀಂ ಕೋರ್ಟ್್ನ ಮಾಜಿ ನ್ಯಾಯಮೂರ್ತಿ ಕೆ.ಟಿ. ಥಾಮಸ್ ಈ ರೀತಿ ಹೇಳುತ್ತಿದ್ದರೆ ನೆರೆದವರು ನಿಬ್ಬೆರಗಾಗಿ ನೋಡುತ್ತಿದ್ದರು!

ತುರ್ತು ಪರಿಸ್ಥಿತಿಯೊಂದೇ ಅಲ್ಲ. ಭಾರತ-ಪಾಕಿಸ್ತಾನ, ಭಾರತ-ಚೀನಾ ಯುದ್ಧಗಳ ಸಂದರ್ಭದಲ್ಲಿ ಸಂತ್ರಸ್ತರಿಗೆ ನೆರವು ನೀಡಿದ ಸಂಘಟನೆ ಅದು. ಯಾವ ಪ್ರಧಾನಿ ನೆಹರು ಗಾಂಧೀ ಹತ್ಯೆ ನೆಪದಲ್ಲಿ ಆರೆಸ್ಸೆಸ್ ಮೇಲೆ ನಿಷೇಧ ಹೇರಿದ್ದರೋ ಅದೇ ನೆಹರು ಚೀನಾ ಯುದ್ಧದ ತರುವಾಯ ಗಣರಾಜ್ಯೋತ್ಸವ ದಿನದ ಪರೇಡ್ ಗೆ ಆರೆಸ್ಸೆಸ್ ಗೆ ಆಹ್ವಾನ ನೀಡಿದ್ದರು. ಇಂದಿಗೂ ಬರ, ನೆರೆ, ಪ್ರವಾಹ, ಪ್ರಕೋಪ, ವಿಕೋಪ, ಭೂಕಂಪ, ದುರ್ಘಟನೆ ಯಾವುದೇ ಅನಾಹುತಗಳು ಸಂಭವಿಸಿದರೂ ಮೊದಲಿಗೆ ಧಾವಿಸುವುದು ಆರೆಸ್ಸೆಸ್, ನಂತರ ಆಗಮಿಸುತ್ತದೆ ನಮ್ಮ ಸರ್ಕಾರಿ ಆಡಳಿತ ಯಂತ್ರ. ಇಷ್ಟಾಗಿಯೂ ಬಹಳಷ್ಟು ಜನ ಆರೆಸ್ಸೆಸ್ ಶಾಖೆಗೂ ಮದ್ರಸಾಗಳಿಗೂ ಯಾವುದೇ ವ್ಯತ್ಯಾಸವಿಲ್ಲದಂತೆ ಭಾವಿಸಿದ್ದಾರೆ, ಮಾಧ್ಯಮಗಳ ಒಂದು ವರ್ಗವೂ ಅದೇ ತೆರನಾದ ಪ್ರಚಾರಾಂದೋಲನ ಮಾಡುತ್ತದೆ, ಅನುಮಾನಗಳನ್ನು ಹೋಗಲಾಡಿಸುವ ಬದಲು ಹುಸಿ ವರದಿಗಳ ಮೂಲಕ ಅನುಮಾನಕ್ಕೆ ಇನ್ನಷ್ಟು ಆತಂಕಗಳ ಭಾರವನ್ನು ಹೊರಿಸುತ್ತವೆ. ಹಾಗಂತ ಆರೆಸ್ಸೆಸ್ ಬಗ್ಗೆ ಇರುವ ಅನುಮಾನಗಳು ನಿಜವಾಗಿ ಬಿಡುತ್ತವೆಯೇ? ಮದ್ರಸಾಗಳಿಗೂ, ಶಾಖೆಗಳಿಗೂ ವ್ಯತ್ಯಾಸವಿಲ್ಲವೆ? ಇಷ್ಟಕ್ಕೂ ಶಾಖೆಗಳಲ್ಲಿ ಹೇಳಿಕೊಡುವುದಾದರೂ ಏನನ್ನು? ತಥಾಕಥಿತ ವಿರೋಧಿಗಳು ಎಂದಾದರೂ ಶಾಖೆಗೆ ಹೋಗಿ ಸತ್ಯಾಸತ್ಯವನ್ನು ಪರೀಕ್ಷಿಸಿ ನೋಡಿದ್ದಾರೆಯೇ? ಆರೆಸ್ಸೆಸ್ ಕಚೇರಿಗಳಿಗೆ ಹೋಗಿ, ಅಲ್ಲಿರುವ ಗ್ರಂಥಾಲಯದ ಕಪಾಟುಗಳನ್ನು ತಡಕಾಡಿದರೆ ಏನು ಸಿಗಬಹುದು ಅಂದುಕೊಂಡಿರಿ?

ಭಗತ್ ಸಿಂಗ್, ಸುಭಾಷ್ ಚಂದ್ರ ಬೋಸ್, ಶಿವಾಜಿ ಮಹಾರಾಜ, ಚಂದ್ರಶೇಖರ ಆಝಾದ್, ಆಲ್ಫಾಕುಲ್ಲಾ ಖಾನ್ ಇಂತಹ ಅಪ್ರತಿಮ ಶೂರರ ಶೌರ್ಯ, ಸಾಹಸ, ಹೋರಾಟ, ತ್ಯಾಗ, ಬಲಿದಾನಗಳನ್ನು ಹೇಳುವ ಪುಸ್ತಕಗಳು ಸಿಗುತ್ತವೆಯೇ ಹೊರತು ಬಾಂಬ್್ಗಳಲ್ಲ. ಆರೆಸ್ಸೆಸ್ ನ ಶಾಖೆಗಳಲ್ಲಿ ಹೇಳಿಕೊಡುವುದೂ ಇಂತಹ ವೀರರ ಕಥೆಗಳನ್ನೇ. ಆದರೆ ಸ್ವಾತಂತ್ರ್ಯ ಹೋರಾಟದಲ್ಲಿ ಪ್ರಾಣಾರ್ಪಣೆ ಮಾಡಿದ ಇಂತಹ ಕ್ರಾಂತಿಕಾರಿಗಳನ್ನು NCERT ಪುಸ್ತಕಗಳಲ್ಲಿ “ಭಯೋತ್ಪಾದಕ “ರೆಂದು ಚಿತ್ರಿಸಿರುವ ಕಾಂಗ್ರೆಸ್ಸಿಗರಿಂದ ಆರೆಸ್ಸೆಸ್ ಬಗ್ಗೆ ಒಳ್ಳೆಯ ಮಾತುಗಳನ್ನು ನಿರೀಕ್ಷಿಸಲು ಸಾಧ್ಯವೇ? ಕಳೆದ ವಾರ ಸಿಎನ್ ಎನ್-ಐಬಿಎನ್ ಚಾನೆಲ್ ನ “ಡೆವಿಲ್ಸ್ ಅಡ್ವೊಕೇಟ್ ” ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ದಿಗ್ವಿಜಯ್ ಸಿಂಗ್ “ಆರೆಸ್ಸೆಸ್ ಒಂದು ಬಾಂಬ್ ತಯಾರಿಸುವ ಕಾರ್ಖಾನೆ ” ಎಂದಿದ್ದಾರೆ! 2008ರಲ್ಲಿ ಮುಂಬೈ ಮೇಲೆ ದಾಳಿಯಾದಾಗಲೂ ಹಿಂದು ಭಯೋತ್ಪಾದಕರ ಕೈವಾಡವಿರಬಹುದು ಎಂದಿದ್ದ ಆಗಿನ ಕೇಂದ್ರ ಸಚಿವ ಎ.ಆರ್. ಅಂಟುಳೆ ಆರೆಸ್ಸೆಸ್ ನತ್ತ ಬೆರಳು ತೋರಿದ್ದರು. ಅದರ ಬೆನ್ನಲ್ಲೇ ತಮ್ಮ ಆಚಾರವಿಲ್ಲದ ನಾಲಗೆಯನ್ನು ಹೊರ ಹಾಕಿದ್ದ ದಿಗ್ವಿಜಯ್ ಸಿಂಗ್, “ಮುಂಬೈ ದಾಳಿಯಲ್ಲಿ ಮಡಿದ ಹೇಮಂತ್ ಕರ್ಕರೆ ದಾಳಿಗಿಂತ 2 ಗಂಟೆ ಮೊದಲು ನನಗೆ ಕರೆ ಮಾಡಿ, ಹಿಂದು ಕಟ್ಟರ್ ವಾದಿಗಳಿಂದ ನನಗೆ ಜೀವ ಬೆದರಿಕೆಯಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದರು ” ಎನ್ನುವ ಮೂಲಕ ಮತ್ತೆ ಆರೆಸ್ಸೆಸ್-ವಿಶ್ವ ಹಿಂದು ಪರಿಷತ್ ಬಗ್ಗೆಯೇ ಸಲ್ಲದ ಟೀಕೆ ಮಾಡಿದ್ದರು. ಮೊನ್ನೆ ಜುಲೈ 13ರಂದು ಕಸಬ್ ಜನ್ಮದಿನದ ಕೊಡುಗೆ ರೂಪದಲ್ಲಿ ಮತ್ತೆ ಮುಂಬೈ ಮೇಲೆ ಆಕ್ರಮಣವಾದಾಗಲೂ ದಿಗ್ವಿಜಯ್ ಆರೆಸ್ಸೆಸ್ ನ ಕೈವಾಡದ ಬಗ್ಗೆ ಶಂಕೆ ವ್ಯಕ್ತಪಡಿಸಿದರು. ನನ್ನ ಬಳಿ ಸಾಕ್ಷ್ಯಾಧಾರವಿದೆ ಎಂದೂ ಪ್ರತಿಪಾದಿಸಿದರು. ಈತ ಎಂತಹ ಹರುಕುಬಾಯಿಯ ವ್ಯಕ್ತಿ ಎಂಬುದು ಇಡೀ ದೇಶಕ್ಕೇ ಗೊತ್ತಾಗಿದೆ. ಟ್ವಿಟ್ಟರ್ ನಲ್ಲಿ “ಡಿಗ್ಗಿಲೀಕ್ಸ್ ” ಎಂಬ ಒಂದು ಥ್ರೆಡ್ ಇದ್ದರೆ, ಫೇಸ್ ಬುಕ್, ಆರ್ಕುಟ್ ಗಳಲ್ಲಿ ನಾಯಿಯ ಮುಸುಡಿಗೆ ಇವರ ಮುಖ ಅಂಟಿಸಿ, “DOGvijay “ ಎಂದೇ ಸಂಬೋಧಿಸಲಾಗುತ್ತಿದೆ! ಹಾಗಿದ್ದರೂ ಮಾಧ್ಯಮಗಳೇಕೆ ಇಂತಹ ಮತಿಗೇಡಿ ಮನುಷ್ಯನ ಮಾತಿಗೆ ಸಲ್ಲದ ಪ್ರಚಾರ ಕೊಟ್ಟು ಆರೆಸ್ಸೆಸ್ಸನ್ನು ಪದೇ ಪದೆ ಕಟಕಟೆಗೆ ತಂದು ನಿಲ್ಲಿಸಲು, ಸಮಜಾಯಿಸಿ ನೀಡಬೇಕಾದ ಅನಿವಾರ್ಯತೆ ಸೃಷ್ಟಿಸಲು ಪ್ರಯತ್ನಿಸುತ್ತವೆ? ಪಾಕಿಸ್ತಾನದ ಅಬೋಟಾಬಾದ್್ನಲ್ಲಿ ಅಡಗಿದ್ದ ಒಸಾಮ ಬಿನ್ ಲಾಡೆನ್ ನನ್ನು ಕಳೆದ ಮೇ 2ರಂದು ಅಮೆರಿಕ ಪತ್ತೆಹಚ್ಚಿ ಕೊಂದಾಗ, “ಒಸಾಮಾಜಿ ” ಎಂದು ಸಂಬೋಧಿಸಿದ್ದ ಈ ವ್ಯಕ್ತಿಯ ಯೋಗ್ಯತೆ ಏನೆಂದು ಗೊತ್ತಾಗಿಲ್ಲವೇ? ಆತನ ಮಾತಿಗೆ ಎಷ್ಟು ಬೆಲೆ ಕೊಡಬೇಕೆಂಬುದು ತಿಳಿದಿಲ್ಲವೆ? ಏಕೆ ಆರೆಸ್ಸೆಸ್ಸನ್ನು ಹಳಿಸಲು ಇಂತಹ ಅಯೋಗ್ಯ ವ್ಯಕ್ತಿಗಳನ್ನು ಬಳಸಿಕೊಳ್ಳುತ್ತಾರೆ?

ಅದಿರಲಿ, ಕಳೆದ ಎಂಟೂವರೆ ದಶಕಗಳಿಂದ ರಾಷ್ಟ್ರಚಿಂತನೆಯ ಪ್ರಸಾರದಲ್ಲಿ, ರಾಷ್ಟ್ರಭಕ್ತಿಯನ್ನು ಮೂಡಿಸುವ ಕಾರ್ಯದಲ್ಲಿ ತೊಡಗಿರುವ ಆರೆಸ್ಸೆಸ್್ನಲ್ಲಾಗಲಿ, ಅದಕ್ಕೆ ಹೊಂದಿಕೊಂಡಿರುವ ವಿಶ್ವ ಹಿಂದು ಪರಿಷತ್್ನಲ್ಲಾಗಲಿ ಅಸೀಮಾನಂದ, ಪ್ರಗ್ಯಾಸಿಂಗ್, ಇಂದ್ರೇಶ್ ಕುಮಾರ್ ಮುಂತಾದ ಕೋಪಾಗ್ನಿಗಳು ಏಕೆ ಸೃಷ್ಟಿಯಾದವು? ಈ ಬಗ್ಗೆ ದಿಗ್ವಿಜಯ್ ಸಿಂಗ್ ಅವರು ಹಾಗೂ ಅವರ ಮಾಧ್ಯಮ ಮಿತ್ರರು ಒಸಾಮನ ವಂಶಸ್ಥರನ್ನೇ ಪ್ರಶ್ನಿಸಬಹುದಲ್ಲವೆ? 900 ವರ್ಷಗಳ ಮುಸ್ಲಿಂ ಆಕ್ರಮಣಕಾರರ ದೌರ್ಜನ್ಯ, 150 ವರ್ಷಗಳ ಬ್ರಿಟಿಷ್ ದೌರ್ಜನ್ಯವನ್ನೇ ಸಹಿಸಿಕೊಂಡಿದ್ದ ಹಿಂದುಗಳಲ್ಲಿ ಈಗೇಕೆ ಕೋಪಾಗ್ನಿ ಸ್ಫೋಟಗೊಳ್ಳುತ್ತಿದೆ? ಮಾಲೆಗಾಂವ್ ಸ್ಫೋಟ, ಅಜ್ಮೇರ್ ದುರಂತಗಳು ಏಕೆ ಸಂಭವಿಸಿದವು? ಮುಸ್ಲಿಮರು ಭಯೋತ್ಪಾದನೆಯತ್ತ ಆಕರ್ಷಿತಗೊಳ್ಳಲು ಅನಕ್ಷರತೆ, ನಿರುದ್ಯೋಗ, ಹಿಂದು ಕೋಮುವಾದ ಹೀಗೆ ಕಾರಣ ಹುಡುಕುತ್ತಾರಲ್ಲಾ ಹಿಂದುಗಳ ಪ್ರತಿದಾಳಿಗೆ ಎಡೆಮಾಡಿಕೊಟ್ಟಿರುವ ಕಾರಣವನ್ನೂ ಹುಡುಕಬಹುದಲ್ಲವೆ? ಇನ್ನು ಎಷ್ಟು ವರ್ಷ ಅಂತ ಇಸ್ಲಾಮಿಕ್ ಭಯೋತ್ಪಾದನೆಯನ್ನು ಸಹಿಸಿಕೊಳ್ಳಬೇಕು? ಸುಮ್ಮನೆ ಕುಳಿತರೆ ಯಾವ ಪರಿಸ್ಥಿತಿ ಸೃಷ್ಟಿಯಾಗುತ್ತದೆ ಎಂಬುದಕ್ಕೆ ಕಾಶ್ಮೀರಿ ಪಂಡಿತರ ಉದಾಹರಣೆ ಕಣ್ಣಮುಂದಿಲ್ಲವೆ? ಇಸ್ಲಾಮಿಕ್ ಭಯೋತ್ಪಾದನೆಯನ್ನು ನಮ್ಮ ಸರ್ಕಾರವೇ ತಹಬಂದಿಗೆ ತರುವ ದಾಢಸಿತನ ತೋರಿದ್ದರೆ ಹಿಂದುಗಳ ಆಕ್ರೋಶಕ್ಕೆ ಕಾರಣವೇ ಇರುತ್ತಿರಲಿಲ್ಲ, ಅಲ್ಲವೆ?

1947ರಲ್ಲಿ ದೇಶ ವಿಭಜನೆಯಾದಾಗ ಪೂರ್ವಪಾಕಿಸ್ತಾನದಲ್ಲಿ (ಬಾಂಗ್ಲಾದೇಶ) 30 ಪರ್ಸೆಂಟ್ ಇದ್ದ ಹಿಂದುಗಳ ಸಂಖ್ಯೆ ಈಗ ಎಷ್ಟಿದೆ? 1991ರ ಬಾಂಗ್ಲಾ ಜನಗಣತಿಯ ಪ್ರಕಾರ ಹಿಂದುಗಳ ಸಂಖ್ಯೆ 10.5 ಪರ್ಸೆಂಟ್! ಇವತ್ತು ಆ ಪ್ರಮಾಣ 5 ಪರ್ಸೆಂಟ್್ಗಿಂತಲೂ ಕೆಳಗಿಳಿದಿದೆ. ಇದಕ್ಕೆ ಯಾರು ಕಾರಣ? ಇದುವರೆಗೂ 2 ಕೋಟಿ ಬಾಂಗ್ಲಾ ಹಿಂದುಗಳು ಕಣ್ಮರೆಯಾಗಿದ್ದಾರೆ. ಒಂದೋ ಅವರು ಬಲವಂತವಾಗಿ ಮತಾಂತರಗೊಂಡಿದ್ದಾರೆ, ಇಲ್ಲವೆ ಮಸಣ ಸೇರಿದ್ದಾರೆ. ಈ ಮಧ್ಯೆ ನಮ್ಮ ಪಶ್ಚಿಮ ಬಂಗಾಳದಲ್ಲಿ 1947ರಲ್ಲಿ ಶೇ 12ರಷ್ಟಿದ್ದ ಮುಸ್ಲಿಮರ ಸಂಖ್ಯೆ ಇವತ್ತು 26 ಪರ್ಸೆಂಟ್ ದಾಟಿದೆ! ಅದು ಸಾಲದೆಂಬಂತೆ ದೀಪಾವಳಿಯ ಮುನ್ನಾದಿನ ರಾಜಧಾನಿ ದಿಲ್ಲಿಯಲ್ಲಿ ಹಬ್ಬದ ಖರೀದಿಯಲ್ಲಿ ತೊಡಗಿದ್ದ 65 ಹಿಂದೂಗಳನ್ನು ಬಾಂಬ್ ಸ್ಫೋಟಿಸಿ ಕೊಂದರು, ಅಕ್ಷರಧಾಮದ ಮೇಲೆ ಆಕ್ರಮಣ ಮಾಡಿದರು. ಇಂತಹ ಘಟನೆಗಳನ್ನು ಹಿಂದುಗಳು ಎಷ್ಟು ದಿನ ಅಂತ ಸಹಿಸಿಕೊಂಡು ಕುಳಿತುಕೊಳ್ಳಬೇಕು? ಹಿಂದುಗಳು ಬಂದೂಕು ಎತ್ತುವಂತೆ, ಬಾಂಬಿಡುವಂತೆ ಮಾಡಿದವರಾರು? ಆತ್ಮರಕ್ಷಣೆಗಾಗಿ ಬಾಂಬ್ ಮೂಲಕವೇ ಪ್ರತ್ಯುತ್ತರ ನೀಡಲು ಹೊರಟರೆ ಅದನ್ನು ಹೇಗೆ ಭಯೋತ್ಪಾದನೆ ಎನ್ನಲು ಸಾಧ್ಯ? 1972ರ ಮ್ಯೂನಿಕ್ ಒಲಿಂಪಿಕ್ಸ್ ವೇಳೆ ಇಸ್ರೇಲಿ ಕ್ರೀಡಾ ತಂಡವನ್ನು ಒತ್ತೆಯಾಗಿ ತೆಗೆದುಕೊಂಡು ಕಗ್ಗೊಲೆಗೈದ ಇಸ್ಲಾಮಿಕ್ ಭಯೋತ್ಪಾದಕರು ಹಾಗೂ ಅವರಿಗೆ ಬೆಂಬಲ ಕೊಟ್ಟವರನ್ನು ಇಸ್ರೇಲ್ ಹೆಕ್ಕಿ ಕೊಲ್ಲಲಿಲ್ಲವೆ? 9/11 ದಾಳಿಗೆ ಪ್ರತಿಯಾಗಿ ಅಮೆರಿಕ ಅಫ್ಘಾನಿಸ್ತಾನದ ಮೇಲೆ ಆಕ್ರಮಣ ಮಾಡಲಿಲ್ಲವೆ? ಒಸಾಮನನ್ನು ಬೆನ್ನಟ್ಟಿ ಹೋಗಿ ಕುಕ್ಕಿ ಸಾಯಿಸಲಿಲ್ಲವೆ? ಪಾಕಿಸ್ತಾನದ ಪರಮಮಿತ್ರ ಚೀನಾವೇ ತನ್ನ ನೆಲದಲ್ಲಿ ತಲೆಯೆತ್ತಿರುವ ಇಸ್ಲಾಮಿಕ್ ಭಯೋತ್ಪಾದನೆಗೆ ಮೊನ್ನೆ ಪಾಕಿಸ್ತಾನವನ್ನು ದೂರಿಲ್ಲವೆ? ಸ್ಥಳೀಯರ ಸಹಾಯವಿಲ್ಲದೆ ಮುಂಬೈನಂಥ ದಾಳಿಯನ್ನು, ಹೈದರಾಬಾದ್್ನ ಲುಂಬಿನಿ ಗಾರ್ಡನ್, ದಿಲ್ಲಿ, ಪುಣೆಯ ಜರ್ಮನ್ ಬೇಕರಿ ಸ್ಫೋಟಗಳಂಥ ದಾಳಿಗಳನ್ನು ಮಾಡಲು ಸಾಧ್ಯವಿತ್ತೆ? ಅಸೀಮಾನಂದ, ಪ್ರಗ್ಯಾಸಿಂಗ್್ರಂಥವರು ಇಂತಹ ದಾಳಿಗಳಿಂದ ಸೃಷ್ಟಿಯಾದ ಪ್ರತ್ಯಾಸ್ತ್ರಗಳೆನಿಸುವುದಿಲ್ಲವಾ?

ಈ ದೇಶ ಇಬ್ಭಾಗವಾಗಲು ಕಾರಣವಾದ ಮುಸ್ಲಿಂ ಲೀಗ್ ನ ಹೆಸರನ್ನಿಟ್ಟುಕೊಂಡಿರುವವರ ಜತೆ ಸೇರಿ ಕೇರಳದಲ್ಲಿ ಸರ್ಕಾರ ನಡೆಸುತ್ತಿರುವ ಕಾಂಗ್ರೆಸ್ಸಿಗರಿಗೆ ಆರೆಸ್ಸೆಸ್ ಎಂಥ ರಾಷ್ಟ್ರವಾದಿ ಸಂಘಟನೆ, ಹಿಂದುಗಳ ಆತಂಕಗಳೇನು ಎಂಬುದು ಹೇಗೆ ತಾನೇ ಅರ್ಥವಾದೀತು?

ಕೃಪೆ: ಪ್ರತಾಪ ಸಿಂಹ